خاص- محمد الحلو يكشف لـ"مصراوي" تفاصيل حالته الصحية بعد انسداد شرايين القدمين

كتب- محمد عمارة:

قال المطرب القدير محمد الحلو، إنه سيجري جراحة بتركيب دعامات وإزالة لانسداد شرايين القدمين يوم الأحد المقبل.

وأضاف لـ"مصراوي": "لن أجري جراحة بتر للقدمين كما ردد البعض، هي جراحة إزالة الانسداد، وتركيب دعامات فقط، ومش عارف مين طلع خبر البتر ده، مفيش الكلام ده، وربنا يكرمني".

وأوضح الفنان القدير: :الحمدلله مفيش غرغرينا ولا الكلام ده، لكن أخويا من سنة ونصف عمل عملية بتر لقدميه وتوفي الله يرحمه لإنه كان وصل لمرحلة متقدمة".

وتابع الحلو: "أعتقد سبب الانسداد السكر، لإني عندي سكر تراكمي، ممكن دهون، حاجات كده، الظاهر أثرت، وكنت مشغول بضهري لإني عندي مشكلة في الفقرات، الموضوع بقى كبر شوية ولازم عملية وتسليك والدعامات".

وأكمل الفنان: "سأجري العملية في أحد مستشفيات مدينة نصر، بواسطة الدكتور عبدالرحمن سليم وهو كبير دكاترة الأوعية وقام بطمأنتي".

وكشف الحلو: "وزارتا الصحة والثقافة كلموني وعايزين هما اللي يعملوها ويتحملوا تكلفتها، الدكتور خالد عبدالغفار وزير الصحة، عايز يعملها على نفقة الدولة".

وقال الحلو: اللي عمل حالة ومتابعة كبيرة هو ابني حمادة اللي صرح وقال اطلبوا الدعاء لوالدي، وأكد: "سأعود للغناء مجددًا ولن أنقطع".