"مش ضد رغبتي".. طليقة خالد عليش تعلق على الحكم الصادر لصالحه

كتب- مصطفى حمزة:

علقت ميما شامي، على الحكم الصادر من محكمة الأسرة، لصالح طليقها الفنان والإعلامي خالد عليش، بإلزامها بتمكينه من رؤية صغيرته منها، لمدة 11 ساعة أسبوعيًا يوم الجمعة.

ميما، عبر صفحتها في موقع فيسبوك، علقت، وكتبت: "لو في حد محتاج توضيح أو هيفهم هي ميما، للأسف عمري ما كنت أحكيلها حاجة وربنا الشاهد على قراري كنت بحاول وكل المحاولات فشلت، والطرق الودية مكنتش نافعة، وأقسم بالله العظيم دا اتقالي واتقال لإخواتي وأصحابي، قضية الرؤية أنا رفعتها عشان أكسرك بس إنتي مبتتكسريش".

وتابعت: "هي الناس اللي بتهاجم وبتتكلم وبتقوله مبروك، أنا يا جماعة كنت مدياله أكتر من ١١ ساعة، وعشان فلوس أعترض على الاستضافة ويشهد ربنا عليا، وعمر ما البنت كملت معاه ٨ ساعات وكان بيرجعها، أنا بس عايزة أقولكم إن الموضوع مليان تفاصيل كتير".

وأضافت: "كل كلامي مع الطرف الآخر، مهما كان مين اللي غلط واللي بيعند بلاش التشهير، بلاش نكتب للناس مش هنوصل لحل بلاش عشان ميما".

وفي رسالة إلى "عليش"، كتبت: "على كلامك ربنا نصرك (مع اني شايفة إنك كنت واخد أكتر من الحكم ده بالود)، اتبسط وابعت اي كلام مؤذي ليا وللي حوليا، واعمل كل اللي إنت عايزه فيا، بس في الآخر ميما مش هتعرف، بس لما الناس عرفت إيه الفكرة، والله مش مستوعبة، معنديش مشكلة برضو إن الناس تعرف بس ليه".

وأكملت: "كلامنا في الموضوع ده حقنا إحنا التلاتة، ليه تاخد قرار نيابة عنها وندخلها فيه، ليه في مدرستها والنادي من حق كل الناس توقفني تسألني عن صحة اللي بيتقال، لية البنت تسمع كلام عن مامتها وباباها، عشان حد فينا ينتصر ؟".

وتابعت: "طيب من وجهة نظركم اللي انتصر خلاص انتصر، وبين وجهة نظره، أنا أقدر اتكلم واطلع لايف وبرامج ومعايا الأدلة، بس والله العظيم أنا مبفكرش في إني أبان صح، أنا بفكر في بنت ملهاش ذنب، من حقها كانت تعيش في سلام بينا، حتى لو حد فينا سيء، مين الصح ومين الغلط ربنا اللي يحكم مش الناس، طبعا أنا حاولت أقول الكلام ده للطرف التاني كتير، أنا بعدت من زمان قوي وبعدت جدا عن كل حاجة، ومش عايزة انتصر ولا أكسب التعاطف يارب كل الناس تقول غلط بس بعيد عن بنتي".

ثم أضافت: "لو بايدي دلوقتي أعمل أي حاجة عشان اسم بنتي ميبقاش متداول بالشكل ده كنت عملت، رجاء وتوسل مني الناس مش عارفين أي حاجة، قرار المحكمة ليس انتصار ومش ضد رغبتي، بس للأسف إنت خسرت أنه مهما المشاكل كانت بينا كانت هتفضل بينا، وكان ممكن يوم تتنسي ومتوصلش لبنتنا، للأسف هتفضل البنت تدفع ثمن شهرتك وترندات اتعملت عليها، ارجوكم التزموا الصمت عشان خاطرها مش عشاني".

وأختتمت: "وآسفة مرة تانية أنا مش هعمل أي حوار مش هدي أي تصريح مش هطلع اي لايف، ولو بايدي اعمل المستحيل عشان أشيل صور بنتي من الأخبار اللي نزلت عننا، بيتهيألي كده كل حد كان نفسه في حاجة عملها، وكل اللي كان نفسه في حاجة قالها، وكل اللي كان عايز يبان انه بيدعم، بان كفاية بقى وكل واحد يشوف حاله وحياته وشغله، ونفكر بعقل إزاي هتعدي البنت المحنة دة وتبقى سعيدة ومبسوطة، مع كل اللي بيحبها وميضرهاش، و يكتب للجميع الخير ويهدي كل واحد غلط في حقها".

يذكر أن محكمة الأسرة بمدينة 6 أكتوبر، أصدرت أمس الأربعاء، حكمًا لصالح الإعلامي خالد عليش، بإلزام مطلقته بتمكينه من رؤية صغيرته منها، لمدة 11 ساعة أسبوعيًا يوم الجمعة.