عباس أبو الحسن: "خد عيلتك وروح اتفرج على فيلم كيرة الجن.. مش هتندم"

كتبت- بهيرة فودة:

حث الفنان عباس أبو الحسن، جمهوره على مشاهدة فيلم "كيرة والجن"، الذي يُعرض حاليا في دور السينما.

وكتب أبو الحسن، عبر حسابه الرسمي بموقع "تويتر": "متحمس جدا إن أنا النهاردة رايح اتفرج على فيلم (كيرة والجن)، وبما إن الكلام والبوستات اللي اتكتبت عليه أكتر من رائعة، يعنى في جميع الأحوال مش هتندم".

أضاف: "لو أنت كمصري عايز تفضل أنت وأولادك تتفرجوا على أفلام مصرية الصنع من الإنتاج الضخم العظيم ده، فقولا واحدا حضرتك تاخد عيلتك أو صاحبك وتنزل تروح السينما وتدفع تذكرة وتتفرج على الفيلم، لإنك ببساطة شديدة لو معملتش كده يبقى تنسى إنك تشوف أفلام تانية بالحجم والميزانية الرهيبة دي".

تابع: "السينما غير إنها قوتنا الناعمة، وما تبقى لنا من ريادة عربية حاسمة، فالسينما صناعة، وصناعة وطنية، يعني مكسب وخسارة وعائد على الاستثمار، فلو المنتج مش بس جاب فلوسه لأ وكسب كمان يبقى ننسى تماما إننا نشوف إنتاج ضخم بالحجم ده، أو حتى مقارب له، السينما لك وبك كمان، ووقتها متلومش غير نفسك والكنبة المريحة اللي أنت مأنتخ عليها".

واستقبلت دور العرض السينمائي أول أمس الخميس 30 يونيو أول أفلام موسم عيد الأضحى السينمائي، فيلم "كيرة والجن" ليبدأ المنافسة على إيرادات شباك التذاكر، وحقق الفيلم في يومه الثاني أمس الجمعة 1 يوليو بالسينمات إيرادًا بلغ 4 ملايين و441 ألفًا و451 جنيها، ليصل إجمالي ما حققه في يومين عرضه إيرادا بلغ 8 ملايين و316 ألفًا و733 جنيها.

"كيرة والجن" تأليف أحمد مراد، إخراج مروان حامد، بطولة كريم عبدالعزيز، هند صبري، سيد رجب، أحمد مالك، رزان جمال، لارا إسكندر، علي قاسم، تامر نبيل وأحمد عز.