أمير طعيمة: مال التحضر بالحجاب والفستان المفتوح والميكرو جيب مش فاهم؟

كتب- عبد الفتاح العجمي:

قال الشاعر أمير طعيمة، إن هناك بعض الأماكن والمطاعم تمنع دخول المحجبات، لافتا إلى أنه لا يفهم "مشكلة البعض مع الحجاب"، حسب وصفه.

وكتب طعيمة، عبر حسابه بموقع "فيسبوك": "هو موضوع فلانة لبست الحجاب وفلانة خلعته ده شاغل الناس ليه، إيه مشكلة البعض مع الحجاب أساسا؟ وبعض الإعلاميين ومن يطلق عليهم العلمانيين بيستقتلوا ليه عشان نفي فرضية الحجاب، يعني لو المحجبة اقتنعت بفتاويك وقلعت الحجاب الكون والكوكب والبلد هيستفيدوا إيه؟".

أضاف: "هل إحنا مثلا دولة بنفرض لبس الحجاب على المرأة فأنت ضد قهرها؟ لا، هل إحنا بنضيق على غير المحجبة مثلا في الوظائف والحياة العامة فأنت ضد ظلمها؟ لا، بل بالعكس دي غير المحجبة هي اللي فيه تضييق عليها في الفن والإعلام وبعض الوظائف، ده حتى فيه أماكن ومطاعم بتمنع دخول المحجبات".

تابع: "يبقى السؤال: الست المحجبة دي مضايقاك في إيه وقارفها في عيشتها بكلامك ليه، وعمال تجيبلي صور قديمة وتقارنها بصور جديدة كما لو كان ده دليل أننا كنا متحضرين وبقينا متخلفين، معلش هو مال التحضر بالحجاب والفستان المفتوح والميكرو جيب مش فاهم؟ يعني المحجبة لو لبست اللي بيبسطك معدل ذكائها وإنتاجيتها هيرتفعوا فالبلد هتروح في حتة تانية؟".

استكمل: "وبعدين تعالى نفترض أننا صحينا من النوم لقينا البلد كلها مفهاش محجبة واحدة زي ما بتتمنوا.. ها؟ طلعنا القمر كده؟ بقينا في مقدمة الدول تعليميا؟ معدل النمو هيزيد؟ هنغزو العالم والجنيه هيبقى بألف دولار؟ ويا عم يا اللي شايف الإلحاد ظاهرة صحية ودعوة للتفكير والشذوذ حرية شخصية، ممكن تتواضع وتعامل المحجبة نفس المعاملة وتعتبرها حرة في اختيار لبسها وتكبر دماغك وتشوف وراك إيه وتعمله، ولا أنت اللي معطلك ومخليك خيبان كده أن فيه ستات محجبات حاجبين عنك أحلامك وأهدافك العظيمة".

يذكر أن آخر أعمال أمير طعيمة أغنية "من أول دقيقة" الذي جمع الفنانة اللبنانية إليسا بالفنان المغربي سعد لمجرد، من ألحان رامي جمال، وتوزيع أحمد إبراهيم.