رانيا فريد شوقي: "ناس قالوا والدي ماسوني وفيه بلاوي بتتقال في حق المبدعين"

كتبت- بهيرة فودة:

انتقدت الفنانة رانيا فريد شوقي، تجاهل إقامة احتفالية للفنان الراحل فريد شوقي، بمناسبة الذكرى الـ 25 على وفاته.

وكتبت رانيا منشورًا، عبر صفحتها الشخصية بموقع "فيسبوك"، قالت فيه: "همسة عتاب رغم إنها مش هتغير حاجة لأن كله إنت تعيش يا حج، في الذكرى الـ 25 لوفاة والدي الحبيب والفنان الكبير فريد شوقي المنتج والمؤلف ومكتشف وساعد نجوم كتير ومخرجين ومنتجين".

وتابعت: "فريد شوقي مؤسسة لوحده أنتج ٣٠ فيلم، السنة اللي فاتت كانت المئوية وفي ظروف كورونا والحمد لله مازال في مخلصين لذكراه كان بالنسبة لهم الأب أو الأخ أو العم أو الأستاذ وكانوا فعلا بيستعدوا لعمل ذكرى تليق باسم ومكانة فريد شوقي والحمد لله تم منها جزء من خلال مهرجان الإسكندرية برئاسة الأستاذ الصحفي المحترم الأمير أباظة وحبيب وابن أبويا الأستاذ الصحفي سمير الفقيه اللي بذل مجهود كبير والمخرج الجميل عمر عبدالعزيز ".

وأضافت: "مهرجان الأقصر للسينما الافريقية برئاسة السيناريست الأستاذ سيد فؤاد ومديرة المهرجان المخرجة عزة الحسيني، وتم تكريمه من جريدة الأخبار ومهرجان همسة برئاسة الأستاذ الصحفي فتحي الحصري وطبعا مهرجان القاهرة عمل من بنها".

واستكملت: "ما علينا المهم كونا مجموعة محددة تكون هي المسؤولة للاحتفال بالمئوية واتقابلنا ٣ مرات وقالوا كلام يفرح القلب وخدنا الكام صورة ودمتم طبعا، القليل منهم نفذ وعوده وعلى راسي طبعا والباقي فنكوش مش هقول أسامي لكن كل اللي هقوله الكلام سهل لكن الفعل أمشير للأسف كلها اجتهادات فردية وغياب تام لأي مسؤول وإحنا اللي كنا بنجري عشان نعمل حاجة وقابلنا وزيرة الثقافة والوزيرة مشكورة قابلتنا أنا وعبير أختي بعد زن مني واتكلمنا وقالت هنعمل احتفال في الأوبرا وبالمناسبة قولنا لها حضرتك مافيش موقع فيه أرشيف كامل عن السينما المصرية وتاريخها في معلومات كتير مغلوطة على مواقع قالت في موقع للوزارة تحت الإنشاء لتاريخ السينما الله أعلم ده تم ولا لسه وطبعآ ما فيش احتفال تم للأسف بسبب كورونا".

وتابعت: "طب ما ممكن نعمل حاجات تانية كتير بعيد عن التجمعات وطب يا جدعان الكورونا قلت الحمدلله إن حد يعبرنا ولا الهوا، مش في دماغهم الحي أبقى من الميت حتى لو كان من أعمدة السينما وغير قوانين بفنه وكان مهموم بقضايا مجتمعة والغريب إن ما فيش متحف للفنانين أو أي مبنى يجمع تاريخ السينما ومقتنيات الفنانين زي ما حصل في مقتنيات العظيم أحمد زكي".

وأردفت: "طب يا جماعة يامسؤولة شوفوا الأجانب بيعملوا إيه وقلدوهم مش هقول إنكم تفكروا قلدوا اللي سبقونا في مثل بيقول "من فات قديمة تاه" وطول ما احنا لا نقدر ولا نذكر الأساتذة والرموز وتاريخنا السينمائي والفني العريق كله في طي النسيان ما تزعلوش بقى من اللي بيحصل واللي لسه هيحصل ما تلموش على قلة الأخلاق وعدم الوفاء والتقدير وعدم معرفة قدر الأساتذة وتاريخهم".

وأكملت: "أنا بتكلم على كل المجالات مش بس الفن نوروا الرموز وأظهروهم خلي الأجيال تعرفهم مش تاخد معلومات مغلوطة من على السوشيال الميديا والنت يا جدعان أنا شوفت بعيني واحد عامل فيديو على التيك توك بيقول إن فريد شوقي ويوسف وهبي وأنور وجدي من الماسونيين والناس كاتبة تعليقات إنها مصدقة وهما أصلا مش فاهمين يعني إيه ماسونية ده في بلاوي بتتقال على كل الرموز وطبعا أحلى تسلية على الفنانين أكاذيب وفتي حسبنا الله ونعم الوكيل".

واختتم حديثها قائلة: "نرجع لكلامنا يا ناس بصوا على الخواجة واللي بيعملوه أفلام وثائقية وأفلام سينما دول عملوا احتفال لمرور ٦٠ عام على شخصية جيمس بوند والله ما عارفة أقول إيه، أختم بهذه السطور المقتبسة من إحدى المقالات " إن الفنون تحمل خبرات وتجارب الحياة، وذلك فهي وسيلة راقية لتنوير وتعليم الإنسان، وتربية ذوقه، وحسّه الجمالي، إن الشعب الذي تنمو فيه الفنون والآداب هو شعبٌ متطوّرٌ".

يذكر أن رحل الفنان الكبير فريد شوقي رحل عن عالمنا في في مثل هذا اليوم عام 1998.