ابنته تكشف.. لماذا فشل عبدالرحيم كمال وأحمد حلمي في مسلسل نجيب محفوظ؟ (خاص)

كتب- وائل توفيق:

صرحت هدى محفوظ ابنة الأديب العالمي نجيب محفوظ أن الفنان أحمد حلمي والسيناريست عبد الرحيم كمال عرضوا على والدتها منذ 8 سنوات فكرة عمل فني عن حياة والدي نجيب محفوظ، لكن لم يحدث أي شيء بعدها سواء توقيع عقد أو غيره.

وقالت ابنة نجيب محفوظ لـ "مصراوي"، منذ عام ونصف تقريبا حجز السيناريست عبدالرحيم كمال روايتين، أضافت: "فوجئت بعد كده بعد ما مضينا حجز روايات أخرى إنه بيعلن عن المشروع من غير ما يرجع لي، كان حجز أصداء السيرة الذاتية وحكايات حارتنا، مجرد حجز يعني، أنا بعمل حاجة حاجة حجز وعقد حاجة تانية".

وتابعت: "سألته عن الموضوع مردش عليا، وبعدين تفاجئت إنه في الصحافة بيعمل حياة نجيب محفوظ ومرجعليش، أولا لازم أوافق واقرأ السيناريو، خاصة إن كان في ناس كتير حوالين بابا بيقولوا كلام غير دقيق، وفي حاجات كانت بتتقال بالقصد غلط، وبعدين لو هتيجي حياته الخاصة مين هيعرفها غير أسرته".

واستكملت: "فمينفعش الطريقة دي معجبتنيش الحقيقة، مفيش حاجة، مفيش أي مفاوضات ولا أي كلام، حتى أنا قولتله إيه اللي حضرتك صرحت بيه، قالي ما أنت مسألتنيش، ودي مش طريقة شغل طبعا فقولتله أنا منتظرة رد من حضرتك، قالي إنت مسألتنيش ومفيش منتج هو ده الكلام اللي هو قاله، حتى لو في منتج أنا الطريقة دي متعجبنيش، لإن دي مش طريقة شغل، إحنا نتفق الأول وبعدين نعلن، مش نعلن وبعدين نتفق، مش اتحط في الأمر الواقع ".