أميرة أديب (ضاحكة): بطلع أهزر ألاقي خبر.. وبقيت أخاف أتكلم (فيديو خاص)

كتبت- منى الموجي:

أعربت الفنانة أميرة أديب عن سعادتها بمشاركتها في مهرجان القاهرة للدراما بدورته الأولى، من خلال مسلسل "مين قال"، لتكون المرة الأولى لها التي تحضر فيها مهرجان يتنافس على جوائزه عملا شاركت فيه.

وتابعت في تصريحات خاصة ومصورة لـ"مصراوي": "مبسوطة اوي كلنا تعبنا في المسلسل، اللي اتعرض في رمضان، وسعيدة كمان ان بقى فيه مهرجان للمسلسلات زي الـ Emmys"، وعما إذا كانت استقبلت أي تعليق من والدها المخرج الكبير عادل أديب ووالدتها الفنانة الكبيرة منال سلامة، أوضحت "ولا أي حاجة بس بابا قالي مبروك. هو بالنسبالهم حاجة عادية متعودين عليها، ومش بنتكلم اوي في الحاجات دي".

علقت أميرة على ما يُثار بشأن فيديوهاتها على خاصية القصص القصيرة بموقع انستجرام، وقالت ضاحكة "اطلع على ستوري أهزر ألاقي مانشيت وخبر، أنا بهزر في البيت، وبقيت أخاف أتكلم، الموضوع بقى يوسع مني أوي يا جماعة، مكنتش أعرف إن ده هيحصل، ولقيت ناس بتقولي إني بعمل ده عشان يطلع تريند، لكن أنا أعرف منين إني هطلع تريند، أنا بتكلم زي ما كنت بعمل زمان مع المتابعين، قدري هعمل ايه".

وردًا على إذا كانت ستفكر فيما بعد فيما ستنشره على مواقع التواصل الاجتماعي، خوفا من انتقادها، قالت "محتاجة أحسب كلامي وكل كلمة بتطلع هتبقى محسوبة بسببكم".

وأكدت أميرة انضمامها لفريق عمل مسلسل يقوم ببطولته الفنان شريف سلامة، مُفضلة عدم الحديث عن تفاصيله، لأنه مؤجل ولم ينطلق تصويره بعد.