فنان فكر بالانتحار وآخر تلقى عرضا للعمل سائق.. ممثلون اشتكوا غدر الفن

كتب- هاني صابر:

أثار الفنان إحسان ترك، تفاعلا عبر مواقع التواصل الإجتماعي عقب إعلانه أنه عدم عمله بالتمثيل منذ فترة طويلة مما دفعه لبيع سيارته وعفش بيته، ومناشدا النجم محمد رمضان بأن يعمل معه في مسلسله الجديد"العمدة" وهو ما استجاب له "رمضان" معلنا انضمامه لأسرة العمل المقرر عرضه في دراما رمضان 2023.

ونستعرض لكم في التقرير التالي ممثلين غدر بهم الفن:

إحسان ترك

شارك الفنان محمد رمضان جمهوره ومتابعي حسابه الرسمي على موقع فيسبوك، صورًا من كواليس مسلسل "جعفر العمدة" المقرر عرضه في سباق رمضان 2023، تجمعه بالفنان إحسان ترك.

وجاءت الصور لتؤكد استجابة رمضان لنداء إحسان، الذي طلب منه في تصريحات إعلامية أن يتذكره، ويمنحه دورا في أي عمل من أعماله، خاصة وأنه لا يعمل منذ فترة، واضطر لبيع سيارته وعفش بيته.

وعلق رمضان على الصور "الفنان القدير إحسان التركي نورت مسلسل جعفر العمدة"، وعلق الفنان كريم الحسيني "محترم من يومك".

"جعفر العمدة" تأليف وإخراج محمد سامي، بطولة محمد رمضان، زينة، منة فضالي، مي كساب، هالة صدقي، إيمان العاصي.

كريم الحسيني

أعلن الفنان كريم الحسيني، عن إقامته مشروع لتحضير المشروبات الساخنة على الطريق، ونشر مقطع فيديو له عبر صفحته الرسمية بموقع "فيسبوك"، ظهر خلاله وهو يعد القهوة على الطريق من خلال ماكينة مشروبات ساخنة، وقال خلاله: "بما أن موسم الفيديو مش شغال في رمضان، قررنا نفتح المشروع العسل ده".

وعلّق "كريم" على الفيديو قائلا: "مشروعي الجديد.. الشغل مش عيب.. حلمك ملوش تاريخ صلاحية".

وعن المشروع، قال: "لما فكرت في عمل مشروع زي ده يسند، عشان الواحد ميشتغلش شغل هو مش عايزه أو أفلام دون المستوى تضطر تقبلها عشان تاخد عربون وتمشي البيت، وتتحسب عليك يوم ما يتعرض عليك حاجة حلوة يقولوا إنه اكس لأنه عمل كذا وكذا. آه مجاليش حاجة في رمضان بس الحمد لله مستورة فتحت مشروع زي أي ممثل أو أي حد بيفتح كافيه او غيره".

وأضاف الحسيني شارحا سبب اختياره لهذا المشروع: "الريسك فيه أقل شوية عشان كده فكرت، فيه، ممكن تفتح كافيه وتخسر، عملت كده عشان مشتغلش شغل مضايقني، ومجاليش حاجة في رمضان، بشكر كل الناس اللي فكرت في حاجة خير زي دي، وكل الناس اللي دعمتني، وناس بتقول كنت بفكر بس مكسوف، ليه مكسوف الشغل مش عيب اعمل اللي انت عايزه وخليك متمسك بحلمك مادام شغل شريف، بشكركم جدا".

شريف إدريس

أعلن الفنان شريف إدريس، اعتزال الفن، عبر حسابه الرسمي بموقع فيسبوك، قائلا: "بسم الله الرحمن الرحيم، بعد ٣٥ سنة سعي وتعب وشقى في الوسط الفني قررت الاعتزال والابتعاد تماما وتغيير مسار حياتي وأي حد عنده فرصة سفر ليا هاكون شاكر ليه وده طلبي الوحيد، وده قرار أخدته بعد ما الأمور وصلت في الوسط الفني لمرحلة عبثية".

وتابع: "الأمور وصلت إني بقيت بشوف بعض الزملاء بيشحتوا الشغل علني علشان يشتغلوا لأن الشغل بقى متقسم على ناس معينة، فلو الأمور وصلت لكده أبعد أحسن، وحتي لما بيجي شغل بيتفرض عليك توافق بأقل الفلوس وتخرج من الشغل مديون، ومواقف مهينة زي إن شركة إنتاج تعرض عليك أجر هو قيمة ربع أجرك والسبب إنهم الميزانية مصروفه ع الديكور، طب خلوا الديكور يمثل".

واستكمل: "هحكيلكم موقف حصل معايا من أسبوع، اتصل بيا حد قالي عايزين حضرتك بكره عندك تصوير في مسلسل كذا بس هتدفع عشرة في الميه للكاستينج دايريكتور، كان هيجيلي جلطه بعد ماقفلت المكالمة ووافقت علشان أنا محتاج أشتغل ومحتاج فلوس".

وأضاف: "ماقدرتش أستوعب الفكرة بصراحة إني بعد العمر ده مضطر أدفع علشان اشتغل فاتصلت واعتذرت، وده الحال حاليا إن الأمور بقت في إيد كاستينج دايريكتور، وده موقف من مواقف كتير مريت بيها لو حكيتها محتاجة كتاب مش بوست ع الفيس، فطالما الشغل بقي لازم يتدفعله، وطالما الشغل بقى بالشحاتة، يبقي بلاش أحسن".

وأردف: "أنا طول عمري راضي الحمد لله، بس حقيقي أنا وصلت لمرحلة اكتئاب وصلتني إني بقيت بنام أحلم بكابوس إني بقتل عيالي وبقتل نفسي لأني وصلت لمرحلة نفسية ومادية إني بقيت مش قادر أربيهم ولا أصرف عليهم وأنا عندي تلات أطفال بعبدهم عباده متخيلين حجم المسؤلي، وبقيت مديون لطوب الأرض".

وتابع: "حقيقي لو حد عنده فرصة سفر ليا هاكون شاكر ليه جداً وهيكون جميل في رقبتي لحد ما أموت لأن حقيقي أنا مش قادر أعيش في البلد دي تاني، أنا حاولت أسعى في أي مجال تاني بس ماقدرتش، وحقيقي لو اتعرض عليا بطولات بعد البوست ده هرفضها لأن البوست ده هو نهاية علاقتي بالمجال اللي اتربيت فيه ودرسته وعشت فيه كل تفاصيل حياتي والحمد لله علي كل شيء".

واختتم حديثه قائلا: "همسح أبلكيشن فيسبوك من تليفوني لأني هنزل أبيع تليفوني أصلا، فأنا هكون متاح أونلاين لحد بالليل، لو حد عنده فرصة شغل وسفر ليا ومش معاه رقمي ياريت يجيبه من أي حد، أنا مش محتاج طبطبة من حد أنا محتاج فرصة سفر وشغل تخليني أعيش ولادي حياة كريمة وبس، شكرا ليكم محبتي للجميع، هاين عليا أقوم أرمي نفسي من البلكونة بعد ماوصلت إني اكتب البوست ده".

شريف خيرالله

كشف الفنان شريف خيرالله، عن تلقيه عرضًا للعمل كسائق تاكسي في تركيا بعدما توقف عن التمثيل السنوات الماضية؛ وهو المنشور الذي أثار جدلًا واسعًا وقتها.

وكتب خير الله، عبر حسابه على موقع "فيسبوك": "الحمد لله بعد توقف عن العمل 3 سنين، جالي شغل جديد أفهم فيه.. سواق تاكسي في تركيا.. أحسن من العيش بالسلف والدين.. لما أموت زغرطوا عليا وافرحوا"

رشا سامي العدل

كشفت الفنانة رشا سامي العدل، عن افتتاحها مشروع عربة للطعام في مدينة دهب.

وقالت رشا، في فيديو عبر حسابها بموقع "فيسبوك": "أنا بفكر في الموضوع ده بقالي فترة، جيت دهب في شهر 7 اللي فات وقررت أشتغل، والناس عارفة إني ممثلة، بس أنا مش بشتغل كتير، أنا مش بلقي اللوم على حد، أنا نقابية بقالي 20 سنة، والنقابة على عيني وعلى راسي، وكل اللي بيطلعلي من النقابة هو الكارنيه والتأمين الصحي".

أضافت: "كمان لا ألقي اللوم على أصدقائي المخرجين والمنتجين،، وروحت طلبت شغل وهما متحركوش عشان كل واحد حر، وكفاية أجي على نفسي عشان خاطر الناس وأولادي، أنا تمردت أولا على بيتي وعلى ماما وأولادي وقولت إن أي حاجة مش مريحاني مش هقبلها ولا هعملها، والقرار ده ريحني جدا".

تابعت: "من شهر 7 اللي فات أنا بصلح من نفسي حاجات، ممكن يكون العيب فيّا ومش بقول إني ملاك، كلنا بناخد قرارات غلط، وأنا اخطأت كتير فى حياتي، وأول الأخطاء عشان اتجوزت مرتين غلط، مش هلوم راجل اتجوزته ومصرفش على بنته، وأنا عشان اتربيت كويس مش هطلع أقطع في حد".

استكملت: "الناس بقت بتدوس عليّا عشان مش بتملق، أنا سعيت وفشلت، وأنا مش بركب تريند، اللي بعمله دلوقتي عشان أكسب لقمة حلال، وأنا مش بركب التريند عشان أنا كتبت عن المشروع ده من فترة طويلة، عايزة أقول إن سهل جدا أخد فلوس من أهلي، ومحدش هيتأخر عليا، بس أنا مش هستنى لحد ما أشحت أو أقول لله يا محسنين، وكل عيلتي جزمتهم على راسي".

اختتمت: "أنا مش هعيب على حد خالص سواء النقابة أو أهلي، يمكن أنا اللي غلط، بس مستعدة أتحمل نتيجة أخطائي، بس أنا هعمل اللي ربنا يقدرني عليه، إذا كان في دهب أو القاهرة أو أي مكان في الدنيا".

حسين أبو حجاج

أعلن الفنان حسين أبو حجاج، عن عودته إلى مهنته الأولى وهي إصلاح إطارات السيارات في ورشته بمحافظة المنيا، بعد تأثر النشاط الفني بانتشار فيروس كورونا المستجد "كوفيد 19".

أحمد عزمي

قال الفنان أحمد عزمي، في برنامج "كلام الناس" عبر قناة "mbc مصر": "كنت مكسوف بعد الإفراج عني من مقابلة زملائي، وأصبحت أشاهد الأعمال التي تقدم، ولدي شعور أن يكون لدي فرصة ثانية، واختبروني وجربوني مرة ثانية، وربنا أكرمني ونويت أبدأ صفحة جديدة ولن أفتح أبواب للماضي، وربنا قال لا تتبعوا خطوات الشيطان، وربنا أكرمني بزوجة ثانية واستقريت وبدأت أفكر في حياتي".

أضاف: "كانت المفاجأة الأستاذ الراحل وحيد حامد واطمأن علي وشاركت في الجماعة الجزء الثاني، ثم عملت مسلسل الشارع اللي ورانا، وكان أكبر إثبات أني تعافيت تماما، وأيضا شاركت في مسرحية الملك لير، ونفسي هذا يصل للمنتجين لأنه كان فيه حذر تجاهي وأنا ابنكم وغلطت وطول عمري تربيت في الوسط الفني، ونفسي أرجع له مرة ثانية".

ياسمين جمال

أعلنت الفنانة ياسمين جمال، عن معاناتها من عدم العمل وقلة الفرص الفنية التي تعرض عليها، ونشرت ياسمين صورة للفنان كريم الحسيني الذي كشف خلالها عن عمل مشروع لبيع المشروبات على الطريق، عبر حسابها الرسمي بموقع "إنستجرام"، وعلقت: "كريم الحسيني أنت صح الشغل مش عيب وده مشروع زي أي حد في الدنيا بيعمل مشاريع صغيرة وبتكبر".

وأوضحت: "كريم واحد من جيلي اللي ابتدينا سوا وطلعنا السلم واحدة واحدة من وإحنا أطفال ودرسنا وبقينا أعضاء نقابة من غير وسايط ولا قرايب ولا ظهر في الوسط الفني غير ربنا سبحانه وتعالى وحب الناس".

وتابعت: "السؤال بقى: كبرتونا ليه؟ نجمتونا ليه؟ قعدتونا في البيت سنين ليه برضه؟!! إحنا جيل صناعة كامل قاعد في البيت ممثلين(شباب وكبار) منتجين، مخرجين، مؤلفين، مديري تصوير، عمال وأول حاجة اتعلمناها من اللي سبقونا في المجال ده الصبر، هنصبر لحد إمتى".

وأضافت: "أنا أول مرة أتكلم بس من ساعة ما شفت كريم وأنا مش قادرة بصراحة واللي عارفني كويس أوي عارف إني ماليش علاقة بما يسمى بال (تريند) وفي الآخر تسمعوا أنه تعب أو مات من الزعل على حاجة ضيع عمره كله عليها وفى الآخر ما خدش حقه".

فاطمة الكاشف

عادت الفنانة فاطمة الكاشف للأضواء، بعد سنوات من الصمت والاختفاء عن الشاشة، عبر استغاثة إلكترونية وجهتها للرئيس عبدالفتاح السيسي، عبر حسابها على "فيسبوك"، حيث نشرت فاطمة زوجة الفنان جمال عبدالناصر، رسالة تستنجد فيها بالرئيس لعدم ترشيحها لأي دور منذ سنوات طويلة، بسبب ما وصفته بـ"عدم وجود عدالة في توزيع الأعمال على الفنانين".

كتبت فاطمة: "هذا الموضوع يسمح له بالنشر من خلال الصحفيين المحترمين أصحاب القلم الحر وهذا الموضوع عن لساني.. نداء عاجل إلى سيادة الرئيس عبدالفتاح السيسى رئيس الجمهورية.. سيادة الرئيس نحن بعض الفنانين الدارسين الموهوبين أصحاب الخبرة الفنية على مدار السنين، وقدمنا أعمالا فنيه مشرفة وحصلنا على جوائز فنية ونتمتع بحب الجمهور الحمد لله والشكر لله، ولكن أصبحنا لا نعمل منذ فترة طويلة بسبب تحكم بعض الأشخاص في من يعمل ومن لا يعمل لأسباب شخصية ومصالح أخرى، ونحن الفنانين لا مصدر لنا للرزق غير هذا العمل ومنا من يعول أسرته بالكامل".

وأضافت: "ما يحدث الآن ليس فيه شيء من العدل ولا يرضي الله سبحانه وتعالى.. وعندما يعرض على أحد منا عملا يكون دون المستوى الذي يستحقه الفنان، أي لا يتناسب مع مكانته الفنية، وفي هذا الوقت عليه أن يقبل أو يرفض.. منا من يقبل مضطرا لأنه محتاج ماديا لكي يعيش وينفق على أسرته.. ومنا من يرفض لكنه يصاب بالاحباط وتسوء حالته النفسية وتنتهي بدخوله مصحة نفسية، وتوجد أمثلة دون ذكر أسماء لعدم الحرج أو يصاب بالمرض حتى يتوفاه الله".

برنسة عبدالغني

قالت برنسة عبدالغني محمد البسط، أشهر كومبارس بالوسط الفني، إنها سيدة مطلقة وتعيش بشقة إيجار جديد بمنطقة الهرم بإيجار شهري 400 جنيه، بخلاف فلوس الكهرباء والمياه.

وتابعت برنسة، وهي تبكي في تصريحاتها الخاصة لـ "مصراوي": "كنت بشتغل زمان طباخة، ووقعت على ضهري وكان ممنوع عليا بعدها إني أقف، وبسبب منع الطبيب لي من الوقوف في المطبخ، اتجهت إلى العمل بالسينما".

واستكملت: "ما بخدش معاش، والكومبارسات مظلومين عشان ملهمش معاش ولا تأمينات، ويوم شغالين وعشرة لأ، وبقالي 4 شهور مبشتغلش، وبقيت استلف فلوس عشان أعيش وبقالي 45 سنة في شغلانة السينما، وأول بداياتي كانت بفيلم (فجر الإسلام)".

وتابعت: "كان عليا فلوس إيجار وكهرباء، واشتغلت مع المخرج معتز التوني الله يباركله بمسلسل (الفرح فرحنا) وسددت جزء من الفلوس اللي عليا ولسه عليا ديون وفلوس للناس".

وأوضحت: "أوجه استغاثة للرئيس عبدالفتاح السيسي بالنظر إلى وضع الكومبارسات في الأعمال الفنية، وحالتهم المعيشية، وبقوله (يا ريس أنا عايزة معاش أعيش منه)، لأني عايشة لوحدي ومش معايا ولد ولا بنت ولا راجل يصرف عليا واتطلقت عشان مابخلفش، وأنا فنيت نفسي في الشغلانة دي" .

وأضافت: "نقابة المهن التمثيلية لا تنظر إلى حالنا ووضعنا وظروفنا الصحية، وأنا ست مريضة وعندي خشونة في الركبة، ولما بتعب بروح الصيدلية وأخد العلاج منها بالشكك، ومش لاقية شغل وبقالي كتير مشتغلتش".

عبد الرحمن أبو زهرة

أثار الفنان الكبير عبد الرحمن أبو زهرة الجدل بعد إعلانه أنه يمر بحالة "اكتئاب" شديدة، بسبب عدم تلقيه عروضا للعمل داخل الوسط الفني سواء في الدراما أو السينما، مشيرًا إلى أنه يفكر حاليًا في الاعتزال بعد خدمة 60 عامًا في الفن.

وأوضح أبو زهرة، أنه من الكوميديانات المميزين، خاصة أنه قدم العديد من الأدوار المهمة في منطقة الكوميديا، مشيرًا إلى أنه يطالب صناع المحتوى الفني ببطولة "عمل كوميدي وهيكسر بيه الدنيا"، متحديًا صناع المحتوى الكوميدي في تقديم عملا يضاهى المسلسل الذي يقدمه، إيماناً بموهبته وعطائه طوال تلك السنوات.

اقرأ أيضا:

بعت عفش بيتي.. محمد رمضان يستجيب لنداء إحسان ترك ويضمه لـ"العمدة"

حسني شتا عن هزيمة الزمالك أمام بيراميدز:"كأن احنا اللي بنلعب ناقصين"

إحدى بطلات الحفيد تخرج عن صمتها: "مش هتكسف أقول لوسي ضربتني وشتمتني"