"ده أنت عامل 100 فيلم هابط"..عمر حسن يوسف يهاجم بيومي فؤاد

كتبت - بهيرة فودة:

هاجم الفنان عمر حسن يوسف، الفنان بيومي فؤاد، عقب تصريحاته الأخيرة عن الفنان محمد سلام واعتذاره عن مسرحية "زواج اصطناعي".

وكتب عمر، منشورًا، عبر حسابه الشخصي بموقع "فيسبوك": "فن إيه اللي بتقدمه.. ده أنت عامل بتاع ١٠٠ فيلم هابط و أخرهم اللي طلعت عملته على المسرح".

وكان الفنان بيومي فؤاد، حرص على توجيه التحية للفنان محمد أنور، مؤكدا أنه أنقذ موقف بقبوله المشاركة في العمل قبل ساعات من انطلاقه.

جاء ذلك في كلمته عقب انتهاء واحدة من ليالي مسرحيته الجديدة "زواج اصطناعي" والتي تُعرض حاليا ضمن فعاليات موسم الرياض في المملكة العربية السعودية، الآتي:

- بنشكر دعمكم وبنشكر مساندتكم لأنور ولينا.. أنا فنان مصري وليا الشرف.

- اسمحولي أشكر معالي المستشار تركي آل الشيخ لوقوفه الدائم جانبنا، وأشكر الدكتور راكان وكل رجال صلة وعلى رأسهم صديقي عدنان الكيال، المسرحية إنتاج اتنين لسه مقبضوناش لحد دلوقتي محمد نصار وصلاح الجهيني، تأليف وإخراج عيل ولا له لازمة محمد محمدي.

- جيت المملكة العربية السعودية وليا الشرف عشان نقدم فننا، مش جايين نضحك احنا جايين نقدم فننا، احنا بنحترمكم وانتم بتحترمونا.

- شيء عظيم إن الفنان يكون له جمهوره في كل الدول، شيء عظيم إني أخرج اتصور مع شاب سعودي أو سيدة سعودية وهي تعلم اني مصري أنا بشرف بلدي.

- من حقك أنك تعتذر عن المسرحية لكن مش من حقك انك تغلط في فنك، إحنا مش بنيجي عشان نضحك إحنا بنقدم فننا المصري، انتوا بتحترمونا واحنا بنحترمكم جدا.

- أنا وكل زملائي بنحترمكم وبنحبكم وهنفضل طول عمرنا معاكم، كتر خيركم.

- إحنا بنقدم فن.. بنتعب ونشقى عشان نقدم فن مش عشان نيجي نضحك، لو الموضوع كده يبقى فيه فنانين من أيام نجيب الريحاني لحد محمد أنور المفروض ينتحروا، احنا بنقدم فن تحياتي لحضراتكم أنا آسف.

- أقسم بالله احنا مش بتوع فلوس والله العظيم مش بتوع فلوس، العرض ده لو قعد 15 يوم تاني بدون أجر، سيادة المستشار يعلم احنا يبقى لينا الشرف ونبقى فرحانين جدا، تحياتي لحضراتكم وأنا آسف.

- إحنا اتظلمنا واتهانا واحنا جايين نقدم فن.

مسرحية "زواج اصطناعي" بطولة مي عز الدين، الفنان بيومي فؤاد، وعدد كبير من الفنانين، وعرض ضمن موسم الرياض في السعودية.