ميرنا وليد في عيد الحب تدعو للرفق بالحيوان: الرحمة مبتتجزأش

كتب- مصراوي:

خضعت الفنانة ميرنا وليد لجلسة تصوير جديدة، شاركتها مع متابعيها عبر "فيسبوك"، وظهرت فيها بإطلالة تناسب عيد الحب باللونين الأحمر والأبيض، وبصحبة كلاب صغيرة.

كما دعت الفنانة ميرنا وليد، إلى الرفق بالحيوانات، والحرص على معاملتهم معاملة جيدة، وانتقدت جميع مظاهر العنف في الشوارع تجاه مخلوقات بإيذائهم.

وقالت خلال صفحتها الخاصة عبر "فيسبوك": "مما لا شك فيه إن ربنا سبحانه وتعالى فضل الإنسان على باقي المخلوقات، ولكن منظر موجع بجد لما تشوف أطفال وساعات للأسف شباب بيعذبوا حيوانات صغيرة، يشوطوا كلب في بطنه يطيروه.. يمسكوا قطة من ذيلها يلفوها مروحة ويحدفوها بعيد.. ألاقي بنت ٦ سنين بتضرب كلب صغير بالقلم بكل تفريغ لشحنة قساوة هي شخصياً بتتعرض لها.. معرفش إيه الإحساس العجيب بالتفوق والقدرة اللي بيحسوه.. بس اللي أكيد إن الرحمة ما بتتجزأش، مستحيل يكونوا بيتلذذوا بعذاب كائنات ضعيفة قدامهم ويكونوا رحيمين بالناس حواليهم".

وتابعت خلال منشور لها: "أرجوكم نعلم أطفالنا الرحمة بمخلوقات الله، الكائنات دي التقرب منها متعة لا يمكن تخيلها، حنية كده بتغمرك، إحساس ما يعرفش قيمته إلا اللي مجربه، الأطفال بنربي فيها الرحمة لما بيشوفونا بنرحم، من غير أي تكلفة مادية لو قدمت بق مية لكلب في الشارع، بلاش حتى لو بس طبطبت عليه".

وأضافت ميرنا وليد: "لو أنت من الناس اللي بتقلق بلاش بس أقلها ما تأذيهوش.. ما تسمحش لابنك أو حفيدك أو أخوك الصغير يأذيه.. فهمه أنه بيألمه وأنه روح وأنه حيتحاسب عليها وانه إكرامها صدقة.. لو علمته ثقافة الإحساس باللي حواليه حاتزرع الرحمة جواه ومع الوقت هايحس بيك شخصياً وبإخواته وجيرانه.. ربنا سبحانه لم يخلق أي كائن عشان نعذبه هو خلق كل حاجة في الكون عشان نستمتع بيها، فـ يلا نبدأ".

الجدير بالذكر أن أخر أعمال الفنانة ميرنا وليد كان مسلسل قيد عائلي عام 2019، كما أوشكت على الانتهاء من تصوير مشاهدها في فيلم الورقة الثالثة وهو إنتاج مصري فرنسي.