"بيمثل وحش".. لماذا رفض نور الشريف مشاركة زينة في "حضرة المتهم أبي"؟

كتبت- منى الموجي:

حلت الفنانة زينة ضيفة على برنامج صاحبة السعادة الذي تقدمه النجمة إسعاد يونس على قناة DMC، وحكت عن تفاصيل مشاركتها في مسلسل "حضرة المتهم أبي" أمام النجم الراحل نور الشريف، وكيف رفضها في البداية وما الذي جعله يوافق عليها بعد ذلك.

وقالت زينة "بالنسبة لي كان الموضوع مختلف انا كنت جريئة وداخلة الموضوع اني جامدة اوي، والحقيقة اني مش جامدة ولا حاجة بخاف، اللي رشحتني المخرجة الكبيرة رباب حسين ربنا يديها الصحة، بنتها آية صاحبتي جدا، بتحبني أوي وهي نفس يوم ميلادي بحبها وست خفيفة ولطيفة، قالتلي مرشحاكي لكذة جت بعدها بيومين قالتلي نور مش موافق عليكي خالص، وقال بقى زينة اللي بتلبس (سينيهات) هتعمل الدور ده، قلتلها على فكرة بيمثل وحش، قالتلي إيه؟ قلتلها انا مش من جمهوره على فكرة".

وتابعت "قالتلي هاقنعه، قلتلها ليه ده انا جامدة اوي المفروض يفرح، كنت عيلة صغيرة ومش فاهمة حاجة واللي يضايقها تغلط فيه، انا جوايا عارفة كويس جدا مين أستاذ نور لكن عايزة ارسم حاجات من برة عشان كرامتي".

وأضافت زينة "قالتلي استني فيه بروفة ترابيزة، قلتلها أنا أجمد من إني أعمل بروفة ترابيزة، وراحت قالتله كده ساعتها وغير رأيه وقال هي اللي هتعمل الدور عايز يجيبني ليه عشان يسفلتني بقى، دي بت لسانها طويل ومجنونة ولا ايه".

وتحكي زينة أن بمجرد دخولها الاستوديو وجدت الفنان نور الشريف أمامها مرتديا جلباب الشخصية التي يقدمها بالعمل وجرت من أمامه وأخذت تبكي، موضحة "حسيت انه كبير أوي وأكبر من المكان وضخم وعيطت وطلعت أجري وجري ورايا، قلتله أنا آسفة متزعلش مني مش هقدر اشتغل معاك، قالي لأ انتي كويسة لو مكنتيش خوفتي كنت همشيكي وانا قصدت اخوفك".

جدير بالذكر أن حضرة المتهم أبي شارك في بطولته إلى جانب النجم الراحل نور الشريف، عدد كبير من النجوم بينهم: معالي زايد، مديحة حمدي، إيمان العاصي، سمير صبري، توفيق عبدالحميد.