"لما ناوي تموت بتهاجر ليه".. عمر زهران ينعى المخرج أحمد رفعت

كتبت- مارسيل نظمي:

نعى الفنان عمر زهران، الرئيس الأسبق لقناة نايل سينما، صديقه مخرج البرامج التليفزيونية أحمد رفعت الذي رحل عن عالمنا أمس 13 فبراير، إثر حادث سيارة بالولايات المتحدة الأمريكية، تاركاً حالة من الحزن عمت الأوساط الإعلامية والفنية.

وكتب "زهران" رسالة مؤثرة إلى صديقه، عبر "فيسبوك"، وقال فيها: "لما أنت ناوي تموت وتصعب الموضوع.. ليه قررت تهاجر وتسيبنا وتتخلى عن الأحلام والطموحات وكل اللي وصلت له في بلدك.. أنا عارف إنك حلمت تروح هناك وتقابل الأحلام اللي اتخنقت منك هنا بين ناسك وأهلك.. ماخطرش على بالك أكيد أن الموت ينتظرك".

وواصل المخرج عمر زهران رسالته: "كنت دايما بقولك أنك أقوى من الحياة وقسوتها .. أول مرة إحساسي وثقتي هي اللي تهزمني.. هتوحشني يا أحمد وهتوحشني اتصالاتك وانت بتقولي أوعى تزهق من وأنا بشكيلك.. كان الهم هناك في الغربة مارد بتحاربه لوحدك.. كنا نضحك ونحكي بدل المرة مرات عن الخناقة الكبييرة اللي كانت بيننا في أول لقاء والخصام والغيرة في الشغل وإزاي قررنا فجأة تحولت لصداقة من أقوى وأجمل الصداقات في حياتي".

واختتم منشوره قائلاً: "أحمد حبيبي.. صحيح الموت بـ يهزمنا ويحرمنا من كل اللي حبيناهم..

وعارف اني بكرهه وبكره سيرته .. لكن اليوم صحيت من النوم دخلت صفحتك ولقيت علامة خضراء على صورتك.. يعني أنت بالنسبة لي مامتش.. وهفضل منتظر تليفونك من أمريكا تطمني على نفسك وزوجتك فرح وأولادك اللي حبيتهم أكتر ماحبيت نفسك.. بجد هتوحشني".

وكانت الفنانة نجلاء بدر، أعلنت أمس الاثنين، وفاة المخرج أحمد رفعت، عبر حسابها على فيسبوك، وكتبت: "بقالي كتير ماعرفش عنه حاجة سمعت إنه هاجر من زمان يوم ما أشوف صورته وأسمع عنه يكون خبر وفاته.. خبر حزين قوي لا إله إلا الله ربنا يرحمه ويغفر له ويسكنه فسيح جناته"

يذكر أن أحمد رفعت هو واحد من المخرجين المؤسسين لقناة النيل للمنوعات، وأخرج عدد كبير من البرامج التليفزيونية على قنوات النيل المتخصصة.