في ذكرى ميلاده..سبب غضب محمود ذو الفقار من مريم فخر الدين

كتب- هاني صابر:

تحل اليوم السبت 18 فبراير، ذكرى ميلاد المخرج محمود ذو الفقار، إذ أنه من مواليد 1912.

وقالت مريم فخر الدين، عن ذكرياتها مع محمود ذو الفقار، في لقاء تليفزيوني سابق: "أنا قعدت متجوزة محمود ذو الفقار 8 سنين، واشتغلت في الفترة دي كتير أوي، ولما كنت بروح أشتغل مع أحمد مظهر ألاقي جليل البنداري الله يرحمه جايبلي صورة عريضة في وسط الصفحة من مجلة (آخر ساعة) ليا مع أحمد مظهر، ومكتوب عليها (الحب الخفي) .. ولما بشوفها بكون خجلانة من جوزي، لأني كنت بشتغل معاه فيلم ومفيش أي حاجة بينا".

وتابعت: "الموقف ده خلاني أخاف أكلم الرجالة أصلا، وسبب الجوازات السريعة، إن جوزي يطلقني بعد 3 شهور وأتجوز واحد تاني، عشان بخاف من الاشاعات اللي في الجرائد، ومبلحقش، كان كل ما يقابلني حد.. يقولي صباح الخير أنا عايز أتجوزك، فأقوله استنى بس لما العدة تخلص، من غير ما أتحقق منه.. ده عشان كنت بخاف من الاشاعات".

وأضافت: "أي واحدة ست مش ممكن تتجوز راجل في شهر أو اتنين أو تلاتة، ولازم تدرسه، وتسأل عليه وتشوفه من عيلة مين".

محمود ذو الفقار من مواليد مدينة طنطا بمحافظة الغربية، وحصل على التوجيهية سنة 1930، ثم دبلوم العمارة سنة 1935، وإلتحق بوظيفة مهندس في قسم التصميمات بوزارة الأشغال.

وبعد فترة قدم استقالته لوزارة الأشغال والتحق بوزارة الأوقاف، وفي الأخيرة تعرف على المخرج حسين فوزي الذي رشحه لدور البطولة أمام عزيزة أمير في فيلم (بياعة التفاح) عام 1937، ليبدأ بذلك مشوارًا طويلا في تمثيل وإنتاج وتأليف أكثر من مئة عمل فني.

وأخرج أول فيلم له (هدية) عام 1947، وهو الشقيق الأكبر للفنانين الراحلين عزالدين ذوالفقار وصلاح ذوالفقار .

كما لديه شقيقين خارج الوسط الفني: كمال الذي ولد بعد عز الدين و قبل صلاح و ممدوح الشقيق الأصغر بعد صلاح.

وكان متزوجًا من الفنانة (عزيزة أمير) حتى وفاتها، ومن ثم تزوج الفنانة (مريم فخر الدين) وأنجبا ابنة وهي (إيمان)، وحدث الطلاق بينهما.