أنسي أبو سيف: تعلمت من العمال ولو تعاملت معهم بنظرة فوقية أقعد في البيت أحسن

الإسكندرية- منى الموجي:

قال مصمم المناظر الفنان أنسي أبو سيف، إن العمل الفني عمل جماعي، وحكى التجربة التي مر بها في مشواره الفني، خلال ماستر كلاس أقامه مهرجان الإسكندرية للفيلم القصير على هامش فعاليات دورته التاسعة في مركز الإبداع بمحافظة الإسكندرية.

وأضاف أنسي "تجربتي اني قعدت في المعهد درست كل ما قيل عليه، وكنت ملتزم اقعد اعمل الرسم الهندسي إزاي هيطلع واشوفه، دخلت الاستوديو اتفضحت، التعليم الحقيقي تعلمته من العمال، الأساتذة علموني حاجات كان لازم اتعلمها بس العمال تعلمت منهم الكثير، اتذكر جدا بعد (يوميات نائب في الارياف) جالي فيلم مودرن كنت عملت مع أستاذ كبير توفيق صالح، وقلت من حقي اتغر وهعمل كل حاجة جالي اسطى نجار قالي حاجة قلتله انت مش فاهم سينما، قالي ده ميتعملش يا أستاذ خد بالك من التنفيذ قالي المساحة دي الإمكانيات بتاعتنا أربعة متر بعد كده منقدرش نعمل لقيت نفسي لسه تلميذ. ولغاية دلوقتي بتعلم منهم".

وأضاف "عمال السينما بالتحديد دارسين ووارثين ١٠٠ سنة من السينما، العامل وارث الصنعة، نجار السينما ميعرفش يعمل كرسي بس يقدر يبني عمارة بطريقته، لديه اسلوب للعمل لازم اعرفه، لو اتعاملت مع العامل بنظرة فوقية يبقى اقعد في بيتنا أحسن".

جدير بالذكر أن أنسي أبو سيف شارك في عدد كبير من الأعمال الفنية مع كبار المخرجين، بينهم محمد خان، يوسف شاهين، داوود عبدالسيد، شادي عبدالسلام، شريف عرفة، من أشهر الأفلام التي قدمها: إبراهيم الأبيض، الكنز، المومياء، يوميات نائب في الأرياف، إسكندرية كمان وكمان، الحرافيش، رسائل بحر، حليم، أيام السادات، أحلام هند وكاميليا.