"وقعت فريسة رامز وحسن حسني ملوش بديل"..أبرز18 تصريحا لـ هاني رمزي في"حبر سري"

كتب- هاني صابر:

كشف الفنان هاني رمزي، عن تفاصيل عديدة في حياته الفنية وبرامج المقالب التي قدمها ومواقف تعرض لها، كما تحدث عن الفنان الراحل حسن حسني ورأيه في المهرجانات وحقيقة وجود جزء ثاني من فيلم "غبي منه غيه"، وألقاب الفنانين.

نستعرض لكم أبرز ما قاله هاني رمزي بالحلقة في السطور التالية:

- ولا فنان موجود يحل مكان حسن حسني وفي ناس كده مش هعرف استوعب بديل لها ومكانه سايب فراغ كبير جدا، وكان بيفنن في أي مكان ويسد في كل حتة.

- لما كنت بقف جنب حسن حسني ببص له إيه العظمة دي والأداء ده ويقدم الشخصية، كما يجب أن تكون ونوعيته قليلة بمعنى الكلمة، وصعب جدا غبي منه فيه يتعمل من غير حسن حسني وممكن نعمل امتداد فقط.

- بيومي فؤاد مش بديل لحسن حسني ولكن هو له شخصيته وطباعه وأسلوبه في الكوميديا، وظلم لبيومي يروح لمنطقة حسن حسني وكويس انه محافظ على نفسه في منطقة وحتة معينة.

- أنا مقلدش رامز جلال ولو كل واحد عمل برنامج مقالب يبقى بيقلد رامز مش حقيقي، وبرنامجي نجح، ولم أقدم برامج جديدة من هذه النوعية لأني مش لاقي فكرة كويسة.

- في برنامج المقالب بتاعي محدش كان عارف حاجة ولازم تشك في ده كمشاهد.

- أنا وقعت فريسة لرامز جلال مرتين في مقالبه ولم أكن أعرف طبيعة البرنامج.

- أنا قلبي ضعيف وكنت بقلق على أصدقائي خلال برنامج المقالب بتاعي، وفي حاجات متتقلش على الكاميرا.

- في ناس رفضت تعرض الحلقة زي وليد توفيق وديانا حداد رفضوا، وأنا مبحبش أزود على الضيف ولا أتجاوز معاه.

- نيللي كريم قاعدة بتزن عليا نعمل غبي منه فيه جزء ثاني، ولما عملت الفيلم معايا كانت نجمة، ومفيش جيل في السينما المصرية يعوض الجيل بتاعنا.

- الجمهور هو اللي بيقول اللقب، وأنا مش من نوعية الفنانين اللي بيطلعوا على أنفسهم ألقاب، ولو أنا من جمهوري هقول الفنان هاني رمزي وأنا شايف الفنان أعلى من أي لقب.

- الناس محتاجة لكوميديا وكل اللي شغال دلوقتي تراجيدي وأكشن والناس في احتياج للضحك وأشد الحاجة للضحك، والنهاردة في الظروف الحالية بندور على حاجة ترفع الروح المعنوية للناس وده واجب وطني إنك ترفع من الروح المعنوية للناس، ولو هنتج هجيب حمدي الميرغني وتوته وعلي ربيع وأوس أوس.

- فكرة الجزء الثاني من فيلم "غبي منه فيه" تظل قائمة طالما أنها مطلب الجماهير لأن الجمهور أحب شخصية سلطان.

- فكرنا أكتر من مرة نعمل الفيلم، لكن الموضوع صعب خاصة بعد رحيل الفنان حسن حسني والفنان طلعت زكريا.

- عندنا ممنوعات كتير وهذه الممنوعات مش قليلة، والفنان بيبقى دايما عنده طاقة وخيال وإبداع إنه يحلق من غير ما حد يؤيده.

- عندي أفكار أفلام كتيرة لا يجوز أقدمها في مصر سواء دينيا أو سياسيا "هتلاقي محاذير كتير جدا وعشان تطلع بحاجة تمس الناس هتلاقي كل فين وفين، وأنا مش بحب اطلع أقول مواعظ وأنا بعيش مع الناس لحظة".

- أنا مع عدم منع المهرجانات واللي مش عجبه ميتفرجش إنما حد يمنع فن وإبداع أنا ضده، وخلي الكل يعمل اللي عايزه وأنت كجمهور نقي والمواطن هو اللي يختار وبسمع المهرجانات، وأكتر مطرب بحبه عمر كمال.

- خلافاتي مع الفنان محمد فؤاد إشاعات لأنه عشرة عمري وجاري وواكلين مع بعض عيش وملح وكنا قريبين من بعض جدًا ومنقدرش نخون بعض أبدًا.

- الفنان عزت أبو عوف الله يرحمه هو الوحيد اللي كان عارف بالمقلب لأنه اعترفتله، لخوفي عليه، ولكن لم أخبره بشكل المقلب لأن شغلي ميبوظش.

اقرأ أيضا|

هكذا أحيا صلاح عبدالله ذكرى وفاة كوكب الشرق أم كلثوم

جنا عمرو دياب تخضع لجلسة تصوير داخل الحمام.. والجمهور يعلق (صور)