بسبب وسامته.. محمد رياض: درست كيمياء في مدرسة بنات والمدير رفدني

القاهرة- مصراوي:

قال الفنان محمد رياض إنه تخرج في كلية العلوم، وكان يحب الكيمياء للغاية، والتحق بقسم الأبحاث والتطوير في إحدى الشركات، ووصل لدرجة أنه اخترع بعض المركبات وأطلق عليها اسمه.

أضاف رياض، خلال حواره في برنامج "معكم منى الشاذلي"، على قناة cbc، أنه عمل في مجال الكيمياء قبل دخول الفن، قائلا: "أنا اخترعت حاجات.. والله العظيم عملت حاجات باسمي قبل ما أسيب الشركة اللي كنت بشتغل فيها، سبتها لأن خلاص مكنش هينفع اكمل عشان التمثيل، وكنت شغال في الأبحاث والتطوير بتاع الشركة".

أوضح أنه عند تخرجه امتهن العديد من المهن إلى جانب دراسته في معهد التمثيل، قائلا: "أنا كنت لسه متخرج من كلية علوم وشغال كيميائي الصبح وبشتغل في معمل تحاليل وبشتغل في مدرسة بنات 3 أيام في الأسبوع".

تابع: "كنت لسه صغير عندي 22 سنة وشعري أصفر وحليوة وبروح لابس تيشيرت وبنطلون جينز.. وأول ما دخلت المدرسة لقيت الطابور بقى فيه همس.. بنات بقى كلهم 18 سنة وعمالين بيتكلموا مين ده وبتاع".

أضاف: "شوية ودخلت الفصل لقيت كله بنات وقاعدين جنب بعض بين الديسكات وزحمة، طلع إن البنات جم من فصول تانية يحضروا حصة الكيميا.. يعني المفروض الفصل 25 بنت لقيت عندي 60 بنت.. وتقريبا الكيميا احلوت في عينهم ساعتها".

أشار رياض إلى أنه في اليوم التالي طلب منه المدير ألا يحضر طابور الصباح ثانية، ففعل ذلك، واستمر في العمل لفترة، إلى أن استدعاه المدير مرة ثانية لمكتبه، قائلا: "المدير قالي أنت شخص كويس جدا ومدرس هايل ولا غبار عليك، بس أنت مش هينفع تكمل معانا.. أنا عندي بنات صغيرين ومينفعش احط الزيت جنب النار.. واترفدت من غير ما اعمل حاجة".

محمد رياض يشارك في بطولة الجزء الثالث من مسلسل المداح- أسطورة العشق، مع الفنان حمادة هلال، والذي من المقرر عرضه ضمن مسلسلات رمضان 2023.

اقرأ أيضا:

محمد رياض يروي تفاصيل اعتزاله كرة القدم واتجاهه للتمثيل

ريهام عبدالغفور تعلن موت كلبها: "بني آدم أكتر من البني آدمين"