روجينا بعد تكريمها في الصعيد: "فرحانة إني أثرت فيهم والأطفال حافظة مشاهدي وجسدوها ببراعة"

كتب- هاني صابر:

حصدت النجمة روجينا، تكريما خاصا من مركز جيل المستقبل للثقافة والفنون في الصعيد بمحافظة سوهاج، عن دورها بمسلسل "ستهم" الذي عرض خلال شهر رمضان الماضي 2023.

وقالت روجينا، خلال كلمتها بالاحتفالية: "أنا اتكرمت في دول كتير واتكرمت في مصر واتكرمت على ستهم، بس التكريم ده بالنسبالي مفاجأة ومختلف عشان لما تعملي عمل وتلاقي أطفال بيحتفلوا بعملك في مشروع تخرجهم وبيمثلوا المشاهد اللي إنتي بتعمليها وكانوا بارعين وهايلين وأثروا فيا وبشكر البنت اللي عامله دوري مذاكرة ستهم ومواهب صغيرة بس مؤثرة ما شاء الله عليهم هيبقوا فنانين عظام لما يكبروا".

وتابعت روجينا: "حسيت احساس غريب أوي أول مرة أحسه.. انتي ساعات تعملي عمل يسعد الناس إنما إنك تأثري في الناس بالشكل ده لدرجة إن هما يمثلوه زي ما إنتي كنتي بتمثليه ده كان بالنسبالي جديد ومختلف ورائع إن المسلسل أثر في الصعيد وأثر فيهم".

وأوضحت: "زمان وأنا في المعهد كنت بمثل الحاجات العالمية كده بتاعت شكسبير ونجيب سرور، وإن أنا روجينا يكونوا حافظين دوري وبيمثلوه ومأثر فيهم بالشكل ده دي حاجة تسعدني".

وأضافت: "أنا كنت مبسوطة إني جاية الصعيد أتكرم وكنت عارفة إنه هيكون احتفال مهم جدا بالنسبالنا، مخوفتش من جمهور الصعيد خالص عشان انتي عاملة شخصية صعيدية فانتي رايحة تحتفلي بمسلسل ستهم وسطهم، فكنت سعيدة بنجاح المسلسل وإن هم متفرجين على المسلسل ومذاكرينه وحافظينه".

مسلسل "ستهم" حقق نجاحا جماهيريا كبيرا عقب عرضه في موسم دراما رمضان 2023 .

"ستهم" بطولة روجينا، وإياد نصار، وجهاد سعد، ونانسي صلاح، وغادة طلعت، ومحمد عبد الحافظ، وبيومي فؤاد، وسلوى عثمان، ومن تأليف ناصر عبد الرحمن، واخراج رؤوف عبد العزيز.