"حب من أول نظرة".. عايدة رياض تروي تفاصيل زواجها من محرم فؤاد

روت الفنانة عايدة رياض تفاصيل زواجها من الفنان الراحل محرم فؤاد وكيف تقدم لها أثناء عملها بالمسرح.

وقالت خلال لقائها ببرنامج واحد من الناس المذاع عبر قناة الحياة مع الإعلامي عمرو الليثي: " كنت هرتبط بواحد وكنت بحبه جدا بس كان في إختلاف في الأديان وحاجات زي كده فمهتمتش وفات فترة وكنت في المسرح في إسكندرية وجه يوم في إجازة للمسرح وقبل الإجازة بيوم جه محرم فؤاد وعمر خورشيد يتفرجوا ع المسرحية قبل الحفلة بيوم".

واستكملت: "في الاستراحة طلع محرم فؤاد وقاله اندهلنا البنت اللي كانت لابسة البنطلون الأزرق.. فنادوني فقولتلهم أستاذ محرم عايزني أنا؟ طلعتله وكان قبلها بفترة عمل حادثة في رجله وقولتله سلامة حضرتك وقالي عايدة أنا عندي حفلة بكرة في المسرح وعايزك تقدميها قولتله حاضر وجيت تاني يوم قالي عايدة انتي هتقدميني أنا وفي بنت تانية هتقدم عمر خورشيد".

وأضافت: "وطلعت قدمته وبعد الحفلة روحنا اتعشينا ووإحنا مروحين قالي عايدة أنا ساكن في العجمي تيجي بكرة تنزلي المياة وكده قولتله اه طبعا ومروحتش ولا حاجة وفات أسبوع على انتهاء العرض وكان كل يوم يروح المسرح يبص ميلاقينيش .. يقول فين عايدة؟ هو حب من أول نظرة .. بعدها ب 15 يوم لما رجعنا القاهرة في مسرح البالون قالولي في تليفون ليكي .. رديت لقيته هو قالي أيوة يا عايدة مش أنا بعتلك ظرف وفيه كارت؟ قولتله أيوه بس أنا اتكسف أكلم حضرتك .. قالي طب أنا عازمك تحبي تاكلي إيه ؟ قولتله بحب البامية".

وأردفت: "وكنت بتكلم مع صاحبتي بقولها محرم فؤاد عازمنا هنروح ولا إيه؟ كنت فاكراه معجب بيا وأنا بغني كده بس يعني ده محرم فؤاد هيعزمنا ليه يعني؟ جه بعدها بـ 5 أو 6 أيام قدام الناس كلها في بروفات المسرح قالي عايدة أنا معجب بيكي وعايز أتجوزك بس كده صدق أو لا تصدق".

يذكر أن أخر أعمال عايدة رياض مسلسل "الهرشة السابعة" بطولة أمينة خليل، علي قاسم، محمد شاهين، أسماء جلال، تأليف مريم نعوم، إخراج كريم الشناوي.

كما يُعرض للفنانة عايدة رياض حاليا على منصة شاهد VIP، مسلسل "ليه لأ 3" بطولة نيللي كريم.