مصطفى درويش يروى تفاصيل أزمته مع الراحل مصطفى درويش بسبب تشابه الأسماء

كتبت- منال الجيوشي
كشف الفنان مصطفى درويش كواليس أزمته مع الفنان الراحل مصطفى درويش بسبب تشابه الأسماء قائلا: "الأزمة أو المشكلة دي حصلت سنة ٢٠١٤، كنت بعمل مسلسل مع أستاذ نادر جلال اسمه العقرب وبعدين فجأة لقيت نفسي مكتوب في التتر مرتين مرة في تتر البداية مصطفى درويش وصورتي ومرة تانية اشترك في التمثيل مصطفى درويش في تتر النهاية"
وتابع: "كلمت المنتج في التليفون قلتله إنت حطتني في التتر مرتين ، أنتوا حابيني أوي كده قالي لا ده ممثل تاني اسمه مصطفى درويش"
وأضاف مصطفى درويش خلال حواره مع الإعلامية إنجي هشام في برنامج المنسي عبر قناة هي:' قلتلوا طب هو دا ينفع ده كده يبقي في اختلاط في الحكاية وجبت رقمه وكلمته قالي يا أستاذ أنا بحبك قلتله وأنا كمان يا حبيبي بحبك مفيش حاجة بس أنا بقولك ده هيعمل مشاكل وبعد فترة الناس بدأت تبعتلي أوردرات مش بتاعتي مرة روحت ٣ شركات أقولهم باعتنلي ده ليه يقولولي معلش ده مش ليك أنت بعد فترة جالي من الضرائب إخطار بحاجات أنا معملتهاش فأقولهم يا جماعة معملتش الأعمال دي يقولولي لا أقولهم مش أنا

تابع: "في الآخر اشتكيت للنقابة والنقابة بعتتله ومضي إقرار أنه هيغير الاسم يخليه مصطفى حسين درويش فمحصلش فاشتكيت تاني لأشرف زكي لحد من سنتين دكتور أشرف جاب مصطفى الله يرحمه بكل حب اتقابلنا في نادي النقابة وطلع مصطفى اتكلم وقال أنا آسف والأزمة اتحلت قبل ما يتوفى بسنتين.

واختتم درويش حديثه قائلا: الموضوع ده فرق معايا على مستوى الشغل مرة كلمت مخرج قالي واحشني قلتله طب مبتجبنيش ليه قالي أنا طلبتك وقالولي دا شغال في كذا حاجة قولتله أنا قاعد في البيت فاتضح أن مصطفى كان بدأ ينتشر والناس افتكرتني أنا وبعدين أوردراته كانت بتجيلي".