نشوى مصطفى: "عشت حياة شديدة الصعوبة وأمي عمرها ما اشتكت"

كتب- مروان الطيب:

حلت الفنانة نشوى مصطفى ضيفة على برنامج "بالورقة والقلم" تقديم الإعلامي نشأت الديهي ويعرض على قناة "Ten".

وتطرقت "نشوي" لبداياتها الفنية وعن علاقتها بنجوم الوسط الفني ومن الأقرب لها، إلى جانب حياتها الشخصية وعن المعاناة التي عاشتها فترة طفولتها.

وتحدثت "نشوى" قائلة: "أنا 57 سنة عشت مراحل في الحياة شديدة الصعوبة ماديًا واقتصاديًا وأبويا كان راجل سواق في المصانع الحربية مرتبه قليل عمري ما شفت أمي متذمرة أو بتشتكي أو تقول لأ المصروف مش مقضي على قد مصروف أبويا كانت أمي ممشية الدنيا".

واستكملت: "وأمي كانت بتفصل كمان وكانت بتفصل لنا لبس العيد وتفصلنا بيجامات الكاستور بتاعة الشتا، وأنا صغيرة كان أبويا يصحى قبل ما يروح الشغل مثلًا الساعة 5 الصبح عشان يقف في طابور جمعية علشان ناخد كيلو لحمة، وأنا ظروفي كانت ضيقة ولأني اتعلمت في بيتنا إني أكون شبعانة مهما كان الظرف ضيقة والاقتصاد صعب كان عندي قوة إني أقف في طابور في الجامعة كلية تجارة جامعة عين شمس وأنا جايبة مفردات مرتب والدي واقف عشان اخد الكتب مجانًا أو بنص الثمن".

مضيفة: "ومش عيب إننا مناكلش لحمة غير مرة في الأسبوع وكنا متعلمين في بيتنا لما نروح عند حد نقول شكرًا إحنا شبعانين".

وأنهت حديثها عن السوشيال ميديا قائلة: "خطورة السوشيال ميديا اللي لازم كلنا نبقي واعيين ليها ومسؤولية الأهالي أنهم ينبهوا أولادهم الفترة الأخيرة انتشر فيديوهات كتير اوي اللي إنت بتصرف كام في اليوم والكلام ده معمول قصد عشان الشباب البسيط يبص على الفيديوهات دي ويقول اشمعنى ما بصرفش 10 آلاف جنيه في اليوم وابتدى أسخط".

يذكر أن آخر مشاركات الفنانة نشوى مصطفى كانت بمسلسل الرسوم المتحركة "قصص الكهف" وعرض بشهر رمضان عام 2022.