"خلع الحجاب".. منال عبد اللطيف تحسم الجدل

كتب- مصطفى حمزة:

حسمت الفنانة المعتزلة منال عبداللطيف، موقفها من الجدل المثار، بعد تصريحاتها عن تفكيرها في خلع الحجاب، وأكدت أنها لن تخلعه داعية الله أن يثبتها على طاعته.

كانت الفنانة المعتزلة منال عبداللطيف، أثارت الجدل خلال ظهورها في برنامج "قعدة ستات"، مع الإعلامية مروة صبري، بقولها: "بفكر أني أقلع الحجاب، ليه الفكرة بتراودني لأن أوقات بتوحشني منال المنطلقة، وأنا بطبيعتي منطلقة وأوقات بتوحشني منال وابقى عايزة انطلق في كل حاجة وأن مفيش حاجة تقيدني لكن سريعًا بقول لأ أنتي تدعي ربنا انه يثبتك لأن دي خطوة مش هينة على طول برجع لدماغي فورًا لكن بتراودني الفكرة طبعًا بتراودني".

وأضافت: "وكل ما بتيجي الفكرة على بالي وأقول يا منال اقلعي بقى الحجاب وبعدين أقول لنفسي انتي اخدتي الخطوة وقعدتي السنين دي، والفكرة اللي بتلح عليا أن إن شاء الله لما بنتي الكبيرة فرح تتجوز بفكر أني في الفرح أقلع الحجاب مش عارفة ليه بس الفكرة دي بتزن عليا ومش ضروري ألبس فستان مفتوح، أهم حاجة اني أكون منطلقة لأن دايمًا الطرحة بتضايقني واقعد طول الوقت أظبطها، وبقالي 11 سنة محجبة".

واختتمت: "أنا بحترم رأي الناس لكن في مناطق شخصية بتاعتي مش بتاعتكم محبش حد يتدخل فيها، ورأي الناس يحترم لكن أنا اللي على قناعتي هعمله وطالما مابيضرش حد يبقى محدش له دعوة بيا، وحتى السوشيال ميديا مبخافش منها، وانا مابيشغلنيش غير دائرتي الأولى جوزي ووالدي وبناتي وصديقاتي المقربات غير كده اللي برا دايرتي براحته".

ومع تصاعد الجدل، قامت الفنانة المعتزلة منال عبد اللطيف، عبر صفحتها في موقع فيسبوك، بنشر تعليق حاسم، وكتبت: "أنا مش هاقلع الحجاب، ربنا يثبتني على طاعته".

الفنانة منال عبد االلطيف، كان أخر ظهور فني لها، في مسلسل "كيد النسا"، الذي عرض عام 2012، وقامت ببطولته النجمة نبيلة عبيد، والفنانة فيفي عبده.