"هبقى كوين بسجن النسا" و"فيه مؤامرة".. تصريحات شيرين عبدالوهاب مع عمرو أديب

كتبت- منى الموجي:

تحدثت المطربة شيرين عبدالوهاب عن أزمتها مع شركة روتانا في مداخلة هاتفية أجرتها مع الإعلامي عمرو أديب عبر برنامجه "الحكاية" المعروض على قناة MBC مصر، كما أعربت عن سعادتها بالنجاح الكبير الذي تحققه أغانيها الجديدة، مرجعة الفضل للجمهور الذي يدعمها، وللشعراء والملحنين والموزعين الذين تعاونت معهم.

وفي السطور التالية ننشر أبرز تصريحات شيرين عبدالوهاب مع برنامج الحكاية..

- "مع كامل احترامي لكل اللي اتكلموا، قسما بالله العظيم، قسما باللي رفع السما والأرض، كل كلامهم غلط حتى المحامي بتاعي لأنه موضحش للناس الموضوع".

- تعاقدت مع "روتانا" وأنا نجمة الوطن العربي بعد ألبوم "لازم أعيش"، والعقد الذي بيننا ينص على أن شيرين عبدالوهاب لو لم يتم عمل دعاية لها توازي حجمها دوليا وعربيا، يُعتبر لاغي.

- سلمت شركة روتانا وقت جائحة "كورونا" أغنية اسمها "مش قد الهوا" لم يتم عمل دعاية لها بخمسة جنيه، وبعدها أغنية "كلها غيرانة" نجحت جدا وكسبوا منها دون دعاية بستة جنيه.

- "اتعلمت اسكت عشان بيتقال شيرين بتاعة مشاكل".

- "كان معايا واحد بيشتغل فجأة لقيته باع أغنية ليا لـ أنغامي بدون علمي ومشيته، ومفيش ورقة تنص على علمي بده، وكلمت مدير روتانا في مصر، إنه من حقه يقاضي المكان الآخر، واللي حصل إنهم قاضوني أنا واخدوا مني أنا.

- "أنا ماضية عقد بـ12 أغنية والألبوم التاني بالتراضي بينا، يعني لازم أوافق، أنا مش كاتبة في عقدي إني أسلم الألبوم كامل وينزلوه مرة واحدة، هما بوظوا كل العقد".

- "همضي مع شركات تانية ليه وأنا عندي شركة تانية ليا والأغاني موجودة".

- "روتانا عايزة شيرين عبدالوهاب حصري في الحفلات، والفلوس اللي دافعينها باخدها في حفلة".

- "قسما بالله روتانا امتنعت عن استلام الأغاني عشان عايزة شيرين حصري في الحفلات وده مش اتفاقنا مفيش الكلام ده، ده رزقي ورزق عيالي مش هديه لحد، كفاية أخدوا مني 8 مليون جنيه".

- "أخر تليفون بيني وبين طوني سمعان بعد ما يئست من الدنيا واللي فيها، قلتله قول لأستاذ سالم الهندي ياخد كام ويحل عني، رجعلي برد مش يحرق الدم، حسيت إنهم متفقين عليا، قالي إحنا عايزين الشرط الجزائي وتعويض".

- "طول عمرهم فيه أذى، وابتدى من أول شرط إني أخد أغنية منك ومعملكيش دعاية، يبقى النية إيه هنا يا فندم".

- بناشد بلدي أنا شيرين عبدالوهاب مطربة كبيرة جدا، أنا آسفة إني بقول الكلام ده عايزة بلدي تحميني من الكلام اللي بيحصل دلوقتي لإن أنا مغلطتش في حاجة".

- "أنا مش ضعيفة، أنا قرش وعندي سنان حامية جدا وبتطلع وقت اللزوم".

- "فيه مؤامرة إني أقعد في البيت، ومكنتش بتكلم، دلوقتي صوتي ده مش هيتقطع أبدا ومحدش هيعرف يوقفني".

- "بناشد القضاء المصري زي ما اتحكملهم بـ 8 ملايين جنيه بالسرعة دي يتحكم لي في القضايا بتاعتي بسرعة".

- "أنا فلة شمعة منورة، والله العظيم زي الفل كتر خيرهم وعلى دماغي اللي بيعملوه عشاني، أنا ماضية دلوقتي مع شركة ربنا واللي واقف معايا رب العالمين".

- "ياريت تخليني أقفل قبل ما أقول حاجة تخليهم يمسكوا عليا حاجة، أنا سجن النسا واحشني جدا ومش فارق معايا حاجة نفسي أجرب تجربة سجن النسا دي، أنا هبقى كوين في السجن وجتتي نحست".

- "قسما بالله ما يحصل الصلح، مش هتصالح مع حد قعدني في البيت 4 أو 5 سنين".

- "قلبي وجعني لاني مش مصدقة النجاح ده كله، الحمد لله ربنا كارمني قوي قوي".

وطرحت شيرين عبدالوهاب مؤخرًا عدد من الأغاني التي حققت نجاحا وتفاعلا كبيرا من الجمهور، بينها "اللي يقابل حبيبي"، "بتمنى أنساك".