4 قرارات مهمة لمشتروات رمضان

مصراوي -

لو دخلت سوبر ماركت قبل رمضان هتلاقي في حركة غربية في السوبر ماركت و كميات منتجات غذائية غير طبيعية بتعبيها الناس في عربات التسوق .. رمضان جميل و بيحب الاكل و لكن هل كل دا 

هما محتاجينه فعلا ؟ هل بالكميات دي ؟... اشتري اللي تحبيه و افرحي و فرحي اسرتك بس خدي بالك من النقط اللي جاية و كوني واعية عن باقي الناس

اولا : العروض :

- اعرفي عروض المكان اللي انت هتشتري منه حاجتك يمكن توفري و كمان احيانا بتكون العروض مفيدة لو علي لحوم او اسماك او فراخ

- بتنزل في رمضان عروض كتيرة جدا جدا علي المنتجات الغذائية بس مش كلها بتكون موفرة ... ادي نفسك فرصة تحسبي التكلفة بين العرض من عدمه و قارني كمان بماركة في نفس المستوي و 

اللي هيوفرلك اكتر اشتريه

ثانيا: وقت الشراء :

قبل رمضان باسبوع بيكون السوبر ماركت مرعب بجد! بس انتي ممكن تعملي حاجة تبعدك عن الرعب دا و كمان عشان ماتقفيش في طابور طويل و انت بتحاسبي و كل عربية و عربية هتاخد نص 

ساعة تدفع فيها الحساب 

- ممكن تجيبي السلع الغذائية الصالحة للتخزين ( الارز / المكرونة / السكر/ المعلبات / ..... الخ ) قبل رمضان بشهر مثلا و لما يجي رمضان اشتري الباقي و ممكن تجيبيه علي فترات برضه

- بما ان رمضان بيجي في الصيف السنين اللي فاتت .. في حاجات ممكن تفسد حتي لو محفوظة في الثلاجة لان التخزين بيكون زيادة علي الثلاجة مع الحر و مش بتكون بكفاءتها اوي عشان كدا ممكن 

تجيبي الجبن و الرايب و الزبادي و كدا اسبوعيا

ثالثا : التحضير :

لازم لازم تكتبي ورقة بالطلبات لان المغريات في السوق وقت رمضان ممكن تخليكي تدفعي اكتر بكتير من الميزانية. حضري في الورقة علي مهلك و اعملي حاجتين و انت بتحضريها 

- اشركي اهل بيتك فيها و اعرفي نفسهم في ايه و يحبوا ياكلوا ايه في رمضان

- بعد ما تكتبيها خديها و ادخلي المطبخ و افتحي الثلاجة و شوفي لو في حاجة منها موجودة فعلا و انت ناسياها و لا كله فعلا مش موجود

رابعا : الميزانية:

حطي ميزانية تقريبية للمشتريات دي و تكون مناسبة ليكي و لبيتك و خديها هي بس معاكي و انت رايحة عشان تعرفي تلتزمي بالورقة اللي انت كاتباها