من لص تائب.. 10 نصائح بسيطة تحفظ ممتلكاتك من السرقة

كتب: أميرة حلمي:

شاهدنا في الآونة الأخيرة الكثير من مقاطع الفيديو التي سجلتها كاميرات المراقبة المنزلية طرق مختلفة يستعملها الحرامية في التسلل إلى المنازل والشقق سواء عبر الباب أو الشباك، وفي أوقات مختلفة من اليوم.

في السطور التالية؛ نستعرض معكم 10 نصائح مهمة لتأمين ممتلكاتكم من السرقة، وفقًا لما قاله محمد راشد، اللص التائب، على برنامج تفاصيل المذاع على قناة المحور:

1- الحرامي لما بيشوف باب شقة حديد بيزهق من صاحب الشقة، وبيمشي لأنه أحسن من 10 حراس، وبيعمل صوت، ومبيتكسرش بالسهل.

2- خد بالك، موسم الحرامية بيكون في الأعياد والمناسبات العامة وشم النسيم.

3- سيب الراديو أو التليفزيون شغال واللمبة منورة لما تخرج من الشقة خصوصًا في الأعياد والمناسبات علشان يبان إن فيه جوا صوت.

4- متحطش جنزير وقفل على باب الشقة، لأن الحرامي بيعرف منها إن مفيش حد جوا.

5- باب الشقة أبو درفتين ملهوش لازمة، زي كأنك حاطط قفل بيسهل السرقة.

6- اختار نوع كالون قوي للباب، يكون 6 تكات.

7- أمّن مداخل ومنافذ الشقة، زي الشباك والمنور.

8- لو أنت راكب عربية متسيبس الزجاج مفتوح لأن ممكن تلاقي واحد بيكلمك من ناحية والتاني بيسرقك من الناحية التانية.

9- لو فيه موتوسيكل خبط عربيتك أو لو اتعرض لأي حادث، اقفل عربيتك وامسك المفتاح وانزل.

10- لو طالع من بنك أو خارج منه، توخى الحذر للي بيسأل أسألة علشان يلهيك، فمتردش على حد، لأنه بيدخلك في حوار علشان يسرقك.