"أصوات غريبة وأبواب بتخبط".. أستاذ بالأزهر يكشف الطريق الوحيد للتخلص من سيطرة الجن

كـتب- علي شبل:

كشف الدكتور محمد إبراهيم العشماوي، أستاذ الحديث وعلومه بجامعة الأزهر الشريف، عن الطريق الوحيد للتخلص من سيطرة الجن على بعض الناس، واضعا احتمالين اثنين في رده على بعض الشكاوى من "سماع أصوات غريبة وطرق أبواب دون وجود أحد من الناس".

وكان العشماوي تلقى بعض الرسائل من متابعيه تقول إن هناك ظاهرة بدأت تنتشر، وهي أن "بعض الناس بقوا يسمعوا أصوات غريبة والأبواب بتخبط عليهم وما يلاقوش حد ومش هما لوحدهم بس اللي بيسمعوا، دول بيسألوا القاعدين معاهم هل سمعوا حاجة ولا لأ ، فبيأكدوا انهم سمعوا، يعني الحكاية مش وهم، دي حقيقة".

وفي رده، قال العشماوي، عبر صفحته الرسمية على فيسبوك:

الأمر ده مكنتش حابب أتكلم فيه، بس زاد قوي من خلال الاستفسارات الكتيرة اللي بتجيلي وخوف الناس اللي بحسه في صوتهم وف كلماتهم، وآخرهم امبارح واحدة من أستراليا والنهاردة الصبح واحدة من مصر، في الحقيقة أنا معنديش تفسير علمي يقيني للأمور دي بس ممكن تفسيرها من وجهين:

الأول أنها قد تكون نوعا من الأمراض النفسية اللي بتخلي صاحبها يتوهم اشياء غريبة ما بتحصلش في الواقع.

والثاني ان اللي بيحصل ده ممكن يكون حقيقي ودول من عالم الجن متسلطين عليه، أو من غير تسليط زي عمار البيوت مثلا أو القرين اللي مع كل إنسان، ودول كائنات حقيقية موجودة معانا، والقرآن والسنة أثبتوا وجودهم واتصالهم بالإنس ممكن من حيث الشرع ومن حيث الواقع، إما اتصال حقيقي مباشر أو في عالم المثال، وممكن يبقوا في صورتهم الحقيقية، أو في أي صورة أخرى إنسانية أو حيوانية.

وتابع الأستاذ بجامعة الأزهر: بس أنا لاحظت ان اكتر الناس عرضة للجن هما اللي نفسيتهم ضعيفة وإيمانهم ضعيف ومشاكلهم النفسية وضغوطات الحياة عندهم كتيرة، فدول بيتصابوا نفسيا والجن بيتسلط تلقائيا على الضعيف نفسيا ويستطيع هزيمته والسيطرة عليه وعلى خياله وعلى عقله ويتحكم فيه زي ما هوه عاوز.

وحدد العشماوي الطريق الوحيد للتخلص من سيطرة الجن على النفس الضعيفة، قائلًا: هو قوة الإيمان وحسن الصلة بالله عز وجل اللي بيدي للنفس قوة عجيبة يخليها تقهر أي قوة إنسية او جنية، وقوة الإيمان دي بتيجي من الطاعة والبعد عن المعاصي ومجالسة العلماء والصالحين وحسن اللجوء والاضطرار إلى الله عز وجل والتوكل عليه وتفويض الأمور كلها إليه والاشتغال بذكره والتحصن بكتابه والاستعانة بالدعاء الصادق الخاشع واستفراغ الحول والقوة واستمدادهم منه سبحانه.. ومفيش مانع من العرض على طبيب نفسي ثقة لعل الأمور لها جانب نفسي محتاج علاج بالعقاقير.

اقرأ أيضًا:

"دعوة أربعين غريبًا مستجابة".. الإفتاء تكشف مدى صحة المقولة المتداولة

4 أدعية كافية شاملة.. داعية سعودي يؤكد: لا غنى لكل مسلم عنها (فيديو)

كل صلاتي بالفاتحة و"قل هو الله أحد".. فهل تقبل؟.. عمرو الورداني يرد (فيديو)