تامر حبيب ينعى والدته بكلمات مؤثرة في "عيد الأم"

كتب- محمد مجدي:

شارك السيناريست تامر حبيب جمهوره بصورة له مع والدته التي وافتها المنية في فبراير الماضي، عبر صفحته الشخصية بموقع تبادل الصور والفيديوهات "إنستجرام".

وكتب "تامر" ناعيًا والدته في عيد الأم الموافق اليوم 21 مارس: "من قبل ما تمشي وأنا شايل هم اليوم ده لما ييجي وانتي مش معايا، وطول عمري بشوفه يوم كئيب وقاسي على كل من اللي اتحرموا من أمهاتهم، وانتي كمان كان رأيك كده، وأهو حصل يا حبيبتي".

وأضاف: "جه اليوم اللي كنتي كل سنة بتصحي تلاقي قدامك الورد البلدي الأحمر والكارت المكتوب عليه: صباح الخير يا مولاتي.. اللي ماكنتش عارف إنه هيحصل إنه مش حقيقي إنك مش هتبقي معايا لا في اليوم ده ولا غيره.. اللي حصل إنك من يوم ما مشيتي وانتي معايا ومبتفارقينيش ولا لحظة أكتر من لما كنتي موجودة بكتير".

واستكمل: "إنتي معايا وحاسس بيكي حواليا وحاسة بيا، إنتي معايا حتى دلوقتي حالاً وشايفة وسامعة كل حرف باكتبه، صحيح وحشتيني قوي، قوي، وحشتيني قوي قوي، وحشني ألمسك وأحضنك، بس إنتي معايا وحياة غلاوتك يا غالية ويا مش هتفارقيني أبداً عشان كده هافضل أقولهالك لغاية ما نتقابل في الحتة الحلوة قوي اللي إنتي فيها... صباح الخير يا مولاتي".