المداخلة الكاملة للرئيس السيسى مع الإعلامى شريف عامر -فيديو

كتب- حسن مرسي:

أجرى الرئيس عبدالفتاح السيسى، مداخلة هاتفية ببرنامج "يحدث فى مصر" المُذاع عبر فضائية Mbc Masr، مساء اليوم الخميس، للحديث عن لقائه بالسيدة نحمده، سائقة الميكروباص، فى العاصمة الإدارية الجديدة.

وقال الرئيس عبدالفتاح السيسى "كل التحية والتقدير للست نحمده، وسبحان الله العظيم مكنتش متخيل إن ألاقى سيدة تسوق عربية فى العاصمة الإدارية اليوم، ومسارى مكنش أنى أمشى فى المكان ده النهارده، وبعد ما خلصت الجولة، وبلف عشان نطلع من مدخل فرعى للطريق الرئيسى، لقيت ميكروباص الست نحمده".

وأضاف السيسى: "وأنا راكب العربية قولت للى سايق دى ست، وقالولى لا يا فندم، فأنا قولتلهم لا نستنى، ونزلنا لكى أقابلها وأحييها، وأنا بحى كل ست زيها تجرى على أولادها وتشقى عليهم وأنا دائمًا أقدر الست المصرية، وهى التى تحافظ على البيت وتشقى من أجل أولادها".

وتابع: "مبروك عليكى يا ست نحمده على العربية الجديدة، ويجعلها ربنا خير ليكى، وده تعب وشقى 8 سنين، وربنا يعد كل شخص يعمل ويخلص برزقه، ولقائنا اليوم كانت رزقك اللى ربنا كتبه، وما حدث اليوم يظهر عزة وحياء الست المصرية".

وأوضح: "لو حبيتى فى أى وقت تقدمى شىء، قدمى لتحيا مصر باسمك، وخلاص العربية باسمك وربنا يجعلها خير عليكى وعلى أولادك".

وتابع: "ساعات الإعلام يوجه صورة مغايرة للواقع أحيانًا، وأنا ألتقى الكثير من العمالة، وعمرهم ما اشتكوا من صعوبة الظروف وراضية عن الأحوال الاقتصادية، ولقاءاتنا تكون فيها شكل جميل من التقدير، ونحن كمصريين محتاجين نتعلم كويس ويكون لدينا المروءة والشهامة مع الست".

وأردف: "يارب أقدر أقدم لكل ست اللى تتمناه، وما قدمته للست نحمده شىء بسيط"، مضيفًا أن "معدلات المنشآت فى العاصمة الإدارية غير مسبوقة، وحجم العمالة فى مصر والمشروعات مخلينى أشعر أن كل بيت مصرى يقدر يشتغل فى مشروع ويكون فاتح بيته منه، ومعدلات العمل فى العاصمة الإدارية والمشروعات الجديدة غير مسبوق".

وتابع: "فى 2019 سأفتتح مشروعات، وإحنا ماشيين كويس جدًا، وطول ما المصريين أيد واحدة هنفضل كويسين جدًا".

ورفض الرئيس تناول الإعلام للأحداث فى أوروبا أخرها المظاهرات فى فرنسا، قائلًا: "لدى ملاحظات على تناول الإعلام المصرى لما حدث فى بعض الدول الأوروبية، مينفعش نقارن بين أسعار الوقود هناك وهنا، وبين نسبة الضرائب هناك وهنا، والإعلام غرضه التنوير والإيضاح".