عن خطوبة طفلَين بكفر الشيخ.. والدة فارس: "ماعملناش حاجة غلط" - فيديو
11:59 م
الأحد 16 ديسمبر 2018
كتب- معتز عباس:
عرضت الإعلامية إيمان الحصري عبر برنامجها "مساء dmc"، المذاع عبر فضائية "dmc"، اليوم الأحد، حفل خطوبة طفلَين بمحافظة كفر الشيخ.
ومن جانبها علقت السيدة سهر، والدة الطفل فارس، خلال مداخلة هاتفية مع البرنامج، قائلة: "فيه ما بينّا صلة قرابة وده الطبيعي ما بينّا، وإحنا كنا عايزين نأكد الفكرة، إن فارس يبقى لندى، فقررنا نعمل خطوبة ونلبس الشبكة"، مضيفة: "فارس عنده 15 سنة في الصف الثالث الإعدادي، وندى عندها 14 سنة في الصف الثاني الإعدادي".
وعن عدم قبول البعض فكرة خطوبة الطفلَين، أكدت والدة الطفل: "فارس ممكن يكون بالنسبة لكم صغير سنًّا، لكنه كبير عقلًا، وهو بعد انتهاء الدراسة بيشتغل مع والده، وابني بيحب البنت بجد من وهمّا أصغر من كده، دلوقتي الحب ما باقاش بالسن، الجيل ده عنده فيسبوك وإنترنت، أنا شايفة إنهم ماعملوش حاجة غلط".
وأضافت الأم: "أنا اتجوزت وأنا عندي 18 سنة واتخطبت وأنا عندي 15 سنة، وقدامهم 4 سنين على الجواز، وأهل البنت ماعندهمش أي مشكلة، لأننا قرايب، وأتوقع أن الخطوبة هتكون محفزة لابني عشان يجتهد في شغله ودراسته، أنا أعرف أطفال أصغر منه بيشتغلوا ومتحملين مسؤولية أهاليهم".
وأكدت والدة فارس: "إحنا ماعملناش حاجة غلط، هما ماتجوزوش، همّا بيحبوا بعض، فقررنا نخلّي الموضوع يكون رسمي، ولو شايفة ابني مش هيكون قد مسؤولية الخطوبة ماكنتش هوافق، إن شاء الله يكملوا مع بعض، وفي فرحهم هنعرَّفكم".
فيديو قد يعجبك:
