زاهي حواس: "ربنا أنقذنا من زلزال كاليفورنيا لأن لعنة الفراعنة معايا"

كتب – محمد خميس:

علق الدكتور زاهي حواس عالم الآثار المصري، على الزلزال الذي ضرب بقوة 7.1 مدينة كاليفورنيا، قائلًا: "امبارح كنت باتعشّى مع السفيرة لمياء مخيمر (قنصل مصر العام بلوس أنجلوس)، ولقينا الدنيا بتتهز، وقُلت للضيف اللي معانا عمرو أديب قال لي على الزلزال اللي حصل لنا، وأنه هو اللي هيجيب النهاية بتاعتنا" معقبًا: "ربنا ستر معانا، لأن الزلزال كان جامد امبارح".

وأضاف حواس، خلال مداخلة هاتفية مع برنامج "الحكاية" المذاع عبر فضائية "إم بي سي مصر"، اليوم السبت: "أول ما الزلزال حصل لقينا الترابيزات بتتهز، وأنا في موضوع الزلزال جبان وضعيف جدًّا، وقُلت لهم إننا شكلنا هنندفن في الأرض، لأن فيه نبوءة بتقول إن كاليفورنيا هتبقى تحت المياه نتيجة للزلزال، ولكن ربنا ستر علينا وأنقذنا؛ لأن لعنة الفراعنة معايا".

وتابع عالم الآثار المصري: "امبارح قابلت مصري اسمه ماجد جرجس، وهو مليونير مصري، وقال لي لو عرفت إن تمثال توت عنخ آمون بيتباع كنت دفعت 6 مليارات دولار ورجعته مصر، ليه بندفع في لاعيبة الكرة مليارات ومانقدرش ندفع في تمثال توت عنخ آمون.. واحنا دلوقتي بنسعى نعرف مين اشترى التمثال والمليونير المصري يدفع الفلوس ونرجعه، ولكن الموقف يؤكد وطنية المصريين وده شيء جميل من هذا الراجل".