سميح ساويرس: لا خوف على مصر.. وإعلام الخارج يحاول تهويل الأمور

كتب- محمد خميس:

قال رجل الأعمال المهندس سميح ساويرس، مؤسس مدينة ومهرجان الجونة: "المهرجان في دورته الثالثة أصبح له رأي، وكل سنة يتحسَّن عن السابقة، والإقبال على مهرجان الجونة يتزايد كل عام، وهو ما يعطينا الإحساس أننا ماشيين صح".

وأضاف سميح، خلال تصريحات أدلى بها إلى برنامج "مساء دي إم سي"، اليوم الأربعاء: "الأمور كافة في مصر كانت هادئة لحد ما العيال دي ظهرت وعملت الشغب ده، ولكن وسائل الإعلام في الخارج ما زالت تأخذ موقفًا وتحاول تهويل الأمور في ما يتعلق بالأحداث في مصر".

وتابع سميح ساويرس: "كان من المقرر استضافة نجمَين عالميَّين؛ ولكنهما اعتذرا عن عدم حضور المهرجان بسبب العيال دي"، مضيفًا: "دي حاجة تزعل إن ينزل شوية عيال يعملوا مشاكل، وهمَّ عددهم 200 عيل كده، ونص عدد الحاضرين في صالة مهرجان الجونة هنلاقيهم أكبر منهم".

واستطرد مؤسس مدينة ومهرجان الجونة: "العيال دول للأسف بيعرفوا يوصَّلوا الرسائل إلى الخارج اللي بيتلهف على أي حاجة تخص مصر، ولكني أعتقد إن كل اللي بيحصل بيدي رسالة إن مصر بها استقرار كبير جدًّا"، مؤكدًا: "باعتباري مستثمر، أنا بقيت مطّمن إني باستثمر وأحط فلوسي في مصر أكتر من قبل كده؛ لأن العيال دي نزلت للشارع وماعرفوش يلموا حتى 2000 واحد من المصريين".

واستكمل سميح ساويرس: "العيال دي نزلت الشوارع؛ لأنهم مأجورون، وبياخدوا فلوس ولهم انتماء، وده وضع طبيعي؛ لأنهم بياخدوا تعليمات، ولكنهم ماعرفوش يلموا حد من الشعب، وبالتالي فلا خوف منهم ولا خوف على مصر".