"لأول مرة باشوف السوشيال ميديا منورة".. أديب مشيدًا بتفهم المصريين للأحداث-فيديو

كتب- محمد خميس:

قال الإعلامي عمرو أديب: "سعيد جدًّا بتعامل المصريين ومبسوط إني شايف الروح الجميلة الحلوة دي في مصر، بابُص على السوشيال ميديا والناس في الشارع في حالة اختلاف كبيرة، وحالة سعادة وأمل، ومابقاش في إحباط، بقى عندنا حالة (أنا ابن مصر أنا ضد الكسر)، بقيت أشوف حسابات الناس الحقيقيين على مواقع التواصل".

وأضاف أديب، خلال تقديمه برنامجه "الحكاية" المذاع عبر فضائية "إم بي سي مصر"، اليوم الأربعاء: "حالة الاستهداف التي كانت موجهة إلى مصر تأثيرها مش قوي وأرقامها مش كبيرة، وفي حالة من الفوقان والتحدي وعدم خوف على الرغم من القلق الخفيف"، معقبًا: "باقول للمصريين ماحدش يخاف، ومبسوط بيكم من حالة اللا مبالاة الذكية اللي عندكم، أنا لأول مرة باشوف السوشيال ميديا منورة بالناس العاديين".

وأوضح مقدم "الحكاية" أن ما تمر به مصر حاليًّا هو "امتحان صعب لبلد فكرة المظاهرات فيه بتعمل فوبيا، عاجبني فهم المصريين للأحداث، وأنا كنت متخيل إن المصريين مش مدركين أفعال الجماعة الإرهابية التي تحاول تصدير حالة زي زمان، ولكن الشعب أصبح بيصد أفعالهم؛ لأن عنده حب للبلد".

وتابع أديب: "الامتحانات في كل الدول حاليًّا؛ أمريكا وبريطانيا وإسرائيل بها امتحان صعب جدًّا، مفيش حلاوة من غير نار، سعيد جدًّا وفخور بيكم وإن شاء الله هنعدي الامتحان في مصر عادي"، مطالبًا المصريين بالنزول والخروج بشكل طبيعي يوم الجمعة القادم، ولا يلتفتوا إلى محاولات تصدير حالة الخوف من الأوضاع في مصر.