"ضربني بدل المرة تلاتة".. بسمة وهبة تعنّف "عاقًّا" بوالدته على الهواء

كتب- معتز عباس:

اضطرت الإعلامية بسمة وهبة إلى إنهاء مداخلة هاتفية لمحمود أبو أمين، الذي تعدى على والدته (الحاجة فاطمة) بالضرب وتخلَّى عنها وتركها تعيش وحدها.

ونشب خلاف في المناقشة بين بسمة وهبة ونجل الحاجة فاطمة الذي رفض الاعتراف بتعديه على والدته، قائلًا: "مين قال لك إني مدّيت إيدي على أمي.. مين قال لك كده؟! ماحصلش الكلام ده، أنتِ ماتعرفيش حاجة في الدنيا، واهدي بقى عشان أنا مش رامي أمّي.. أنتِ مش أحن عليها منِّي".

وأضاف أبو أمين: "أنا كنت عايز أتجوز ابنة خالتي.. لكن أمي لم تساعدني في شيء ولم تحضر لي فرح ولا شبكة، ولينا 3 بيوت متشطبين، وهيّ مش قاعدة معنا".

وعلقت الإعلامية قائلة: "أنت تتكلم في موضوع ماليش علاقة به، وبنتكلم في موضوع محدد، أنت ليه ضربت والدتك؟ وقاطع الطريق علي أي شخص يحاول إنه يقرب منها؟! وانت ليه بتتعدى على ست ضعيفة لاحول لها ولا قوة؟!".

وعرضت مقدمة "كل يوم"، فيديو للحاجة فاطمة تبحث فيه عن منزل آدمي بالشرقية، قائلةً: "أنا مش عايز حد يستعجب من حكايتي، أنا جوزي هجرني من 13 سنة، وأولادي كانوا عايشين معايا في أمان الله، أنا أم محمود أبو أمين، فضّل مراته عليَّ عشان فلوس أبوها، وضربني بدل المرة تلاتة، وبادوّر على مكان أقعد فيه".