"نفسي أتصور بالدرع"..عمرو أديب: "عملت كل حاجة والأهلي بياخد الدوري"

كتب- حسن مرسي:

هنأ الإعلامي عمرو أديب، النادي الأهلي بحصوله على بطولة الدوري العام 2019/2020، قائلًا: "نفسي نغير حتى الصيغة يبقى سنة وسنة، أربعة والخامسة، لكن هنعمل ايه نفس الكلام بقوله كل سنة ومن جوايا بيبقى عندي كرشة نفس، ولكن بنهنئ النادي الأهلي بحصوله على درع الدوري الـ 42".

وأضاف "أديب" خلال تقديمه لبرنامجه "الحكاية" على فضائية "إم بي سي مصر" اليوم السبت: "الأهلاوية بيقولوا أن الدرع طلع يتفسح شوية وراجع تاني، وأنهم مطلعين الدرع يشم هواء لأنه مبيروحش حتة، لا يمين ولا شمال، رغم أنه ممكن يعدي الكوبري لنادي الزمالك، ولكني بتضطر أني أهنئ النادي الأهلي بالدوري".

ومازح "أديب" الأهلاوية: "زي كل سنة بقولكم دا آخر دوري الأهلي هياخده، وقلت دا من 20 سنة، أن الـ 10 سنين الجايين الزمالك هياخد الدوري، وبفضل أعمل كده"، مضيفًا: "بجد بهنئ النادي الأهلي بحصولهم على الدرع وكان موقف جميل تهنئة مؤمن زكريا وحضوره احتفالية التكريم ومن رأيي دا دوري مؤمن زكريا ومشاعر طيبه جدًا من زملاءه وأحبائه، والأهلي يستحق الفوز بالدوري لأنه كان فارق بعدد من النقاط".

وتابع: "نفسي أتصور جنب درع الدوري مرة، وأتصور جنبه في الأهلي زي مؤمن زكريا مش لازم في الزمالك، ويوم ما ناخد الدوري يحطوا الصورة بقى"، مضيفًا: "كل سنة نفس الحكاية الأهلي ياخد الدوري، غيرت القنوات وشعري وقع وعملت دايت وخسيت وجت الكورونا وعزلت من المنيل لـ 6 أكتوبر والأهلي بياخد الدوري، عملت كل حاجه والأهلي بياخد الدوري ألف مبروك للأهلي وجمهوره".