"يوم الحرب ساب البيت"..جيهان السادات: "زوجي كان واثق من انتصار أكتوبر"

كتب- محمد خميس:

أكدت جيهان السادات قرينة الرئيس الراحل، أنور السادات: "كنت حاسه أن الحرب جايه وقريبة بس معرفش أمتي، ودا من اجتماعات الضباط في البيت والقيادة، ويوم الحرب ساب البيت وعرفت من وقتها ومسألتوش ليه، عشان كنت عارفه أن في حاجة قربت".

وأضافت "السادات" في حوارها لبرنامج "كلمة أخيرة" مع الإعلامية لميس الحديدي، على فضائية "ON E" اليوم الثلاثاء: "كنت بسيب بيتي وبروح لزوجي قصر الطاهرة لأنه فضل مدة وصلت حوالي شهر هناك بعد حرب أكتوبر" موضحة: "الرئيس الراحل كان واثق من النصر وأنا كنت منهارة عشان حضرت حرب 1967 وكانت عمالة اسأل ازاي هنحارب إسرائيل القوية وكان عندي خوف داخلي لكن الرئيس السادات مكنش عنده خوف خالص".

وتابعت: "كنا بنتمشى هنا في الجنينة وقولتله إن شاء الله ربنا هينصرك، قالي أنا واثق واثق أن ربنا معايا وهينصرني، ومكنش عنده أي نوع من الشك في الانتصار"، مؤكدة: "لما كلمته عن وفاة أخوه الصغير في الحرب، قالي يا بخته دا استشهد زي كل ولادنا اللي بيستشهدوا ومفرقش بينه وبين العساكر والضباط اللي بيموتوا".