"فاكر نفسه عبده موتة".. بسمة وهبة تنصح محمد رمضان بمراجعة نفسه قبل فوات الأوان

كتب- معتز عباس:

عبرت الإعلامية بسمة وهبة عن استيائها مما يفعله محمد رمضان عبر مواقع التواصل الاجتماعي، وسخريته من الكابتن الطيار أشرف أبو اليسر في أحد الفيديوهات، متابعةً: "حول نفسه لعبده موتة، وهينزل يقفل الشارع بعد كده".

وانتقدت وهبة، عبر برنامج "كل يوم"، المذاع عبر فضائية "أون إي"، اليوم الأربعاء، تناقص محمد رمضان في تصرفاته؛ كونه يصف نفسه بأنه "جدع وابن بلد"، ثم يُماطل في حل مشكلة الطيار أو مساعدته، مضيفةً: "لما حصلت المشكلة طلع يعمل بطل وشهم قدام الناس ويقول إنه هيحصل وهيحصل، وتخيل إن الناس هتنسى، بس الناس مش هتنسى".

وتابعت الإعلامية: "لما المشكلة كبرت رمضان افتكر نفسه إن جمهوره واقف في ضهره، الحقيقة إنه من كتر ما بيغنِّي لنفسه وعن نفسه صدق نفسه ونسي إن المصريين مهما حبّوا حد مش بيوافقوا على الظلم وقلة الجدعنة، رمضان نفسه اتصدم وخاف وحذف الفيديو اللي اتهم فيه الطاير إنه يبتزه وعايز منه 9 ملايين جنيه؛ لأنه شاف الناس بتقول له حقه ولازم تعوضه، كان فاكر إن الجمهور هيقول له دوس على أي حد يا فنان وانت نمبر وان، واضح إنه فاهم المصريين غلط".

ووجهت وهبة إلى رمضان رسالةً، قائلةً: "يا ريت يتعظ، والنجاح الحقيقي محبة الناس واحترامهم.. راجع نفسك قبل فوات الأوان".