"وعدت فأوفيت"..والد شهيد "الواحات" مخاطبًا السيسي عقب إعدام عشماوي- فيديو

كتب- محمد خميس:

علَّق صلاح عفيفي، والد الشهيد الرائد عمرو صلاح شهيد حادث الواحات، على تنفيذ الجهات المسؤولة اليوم حكم الإعدام بحق الإرهابي هشام عشماوي، قائلًا: "الفرحة النهارده عند كل أم وأب وزوجة شهيد، وعايزين نقول للرئيس عبد الفتاح السيسي: أنت وعدت فأوفيت لولادك، وقلُت ولادي مش هسيب حقهم وحق دمهم، وجبت حقهم".

وأضاف عفيفي، خلال مداخلة هاتفية مع برنامج "مساء دي إم سي"، اليوم الأربعاء: "النهارده كان عيد عندنا، وهو عيد رأس الأفعى، واحنا مستنيين حتى القضاء على آخر إرهابي يكون في مصر؛ لأن مصر قوية بشبابها وقوية بأبطالها اللي استشهدوا عشان مصر تفضل في أحسن حال"، متابعًا:"طول ما الرئيس السيسي موجود مصر هتبقى في أمان، وتحيا مصر".

وتابع والد الشهيد: "في السنتين اللي فاتوا ربنا يعلم بحال أهالي الشهداء كلهم، والنهارده بدأنا نتنفس شوية، والتنفس الطبيعي هيبقى بأننا نرتاح لما نقضي على كل إرهابي في مصر، وباقول لك الدور جاي عليهم زي ما جه على عشماوي، ومش هيتسابوا".