أديب: خطاب السيسي بالأمس أزعج أردوغان.. ومصر على قلب رجل واحد

كتب- حسن مرسي:

علق الإعلامي عمرو أديب، على تصريح الرئيس التركي، رجب طيب أردوغان بأن تدخل مصر في لييبا غير شرعي، وقال: "أردوغان بيقول أن تدخل مصر في ليبيا مش شرعي، دي ممكن نسمع فيها أصوات كتير بقى، على فكرة إحنا في فترات كتيرة في التاريخ كنا بلد واحدة إحنا وليبيا، والرسايل الكتير اللي بعث بيها الرئيس السيسي امبارح خلت أردوغان يتحدث اليوم، ولازم نعرف الأول هنحارب مين وكلام الريس امبارح كان مزعج لأردوغان وخلاه تايه".

وأضاف أديب، خلال برنامجه "الحكاية"، المُذاع عبر فضائية "mbc مصر"، مساء اليوم الجمعة: "في دول أنظمتها قائمة على الحرب، زي نظام أردوغان كده، وفي مساندة أمريكية لتركيا، شجعت الراجل أن يلطش هنا وهنا في سوريا والعراق وليبيا، هو بالنسبة له الحرب مهمة ودي نظريات طبقتها دول استعمارية زمان، وبيحارب في جبهات كتير، إحنا بنتكلم على إسرائيل جديدة في المنطقة، وبالمناسبة إسرائيل معندهاش أي مشكلة معاه".

وأضاف أديب: "في دولة زينا بتتعامل مع الحرب على أنها وسيلة، وسيلة أمن ووسيلة ردع وحفاظ على أمن قومي، جيش له عقيدة واضحة بيدافع عن الحدود، والناس اللي بتسأل مصر هتحارب، دي مسألة ليست سهلة الموضوع لازم يتعرض على مجلس النواب، وفيه طرق دستورية وقانونية بتنظم القصة دي، وهو في كل الأحوال قرار صعب اتخاذه".

وقال: "الحروب كل الجهات المشاركة فيها بتخسر، بس القصة مين هيخسر أكتر، وفي النهاية كل الأطراف بتكون خاسرة، وجميل أن الناس تكون فرحانة وفخورة بقوتها العسكرية الكبير وتصنيف جيش مصر دوليا، وفي دول كتير في المنطقة واخدة موقف عدائي مع تركيا بس مبتحاربش، علشان كده العالم كله مستني يشوف مصر هتعمل إيه".