"عندي ناس غلابة".. محافظ جنوب سيناء: "مفيش حاجه اسمها منع تسليم الكتب بسبب عدم دفع المصاريف"

كتب- محمد أبوالمجد:

كشف اللواء خالد فودة، محافظ جنوب سيناء، تفاصيل توجيهه بتسليم الكتب للطلاب دون التقيد بالمصاريف المدرسية بالرغم من إعلان الوزير بعد تسلم الكتب إلا بعد سداد المصروفات، قائلًا: "الأمن القومي في شمال وجنوب سيناء غير أي حته ولازم الجميع يبقى عارف كده اللي موجود على رأس المسؤولية لازم يبقى عارف أن البدو أهلنا لازم يكون لهم معاملة خاصة".

وأضاف "فودة" في مداخلة هاتفية لبرنامج "يحدث في مصر" على فضائية "إم بي سي مصر" اليوم الأربعاء: "أن هناك مدرستين يابانيتين في المحافظة مصاريفهم 10 الاف جنيه، ومن احساسي بقول ان الأهالي في مدينة الطور ميقدروش يدفعوا 10 آلاف جنيه، وأنا بقالي 3 سنين بدفع 5 آلاف جنيه لكل طالب بقف جنبهم وبحيي الفكرة والتجربة وبشجع قرار الرئيس عبدالفتاح السيسي وواقف جنبه عشان ميتقالش أن جنوب سيناء مفيهاش مدارس يابانية، ولولا كده مكنتش المدارس هتشتغل".

وتابع: "كنت بفتتح مبنى جديد في أحد المدارس بالمحافظة لتقليل الكثافة، وأصبح هناك 35 طالب بكل فصل في المحافظة"، موضحًا: "دخلت بنفسي لأحد المدارس وسألت عن الكتب المدرسية ووجدت أن الطلاب لم يتسلموا الكتب وزعقت كتير وقلت مينفعش الطلاب متستلمش الكتب، وعرفت أن هناك تعليمات بعدم استلام الكتب قبل دفع المصروفات، والكلام دا مش عندي أنا أنا عندي ناس غلابة".

وأردف، محافظ جنوب سيناء: "أوعوا تفتكروا أن جنوب سيناء هي شرم الشيخ أو رأس صدر، وكاترين، لكن جنوب سيناء فيها ناس غلابة"، مؤكدًا: "أزاي في مبادرة حياة كريمة بوجود الرئيس السيسي ميستلمش الكتب عشان مدفعش المصاريف ليه طب أحنا فين ولذك اتخذت قرار فوري وانا في الفصل ووجهت بإعطاء الكتب للطلاب ومدير المدرسة اللي مش هينفذ هديله جواب وهمشيه، والغير قادر من الطلاب أنا هدفعله الفلوس".