"تعامل معنا كأب".. طالب بكلية الحقوق عن حواره مع الرئيس السيسي

كتب- محمد أبوالمجد:

كشف حسين وائل، الطالب في الفرقة الأولى بكلية الحقوق، تفاصيل حواره مع الرئيس عبدالفتاح السيسي خلال الإفطار الجماعي بجامعة كفر الشيخ، قائلًا: "قبل ما الرئيس عبدالفتاح السيسي يدخل القاعة، كنت خائفًا ومتوترًا ولكنه بمجرد وصوله أطمنت لأنه بسيط ومتواضع جدًا وطريقته حلوة جدًا في التعامل معانا وأحنا بنسمعه كأب قبل ما يكون رئيس".

وأضاف "وائل" في حواره لبرنامج "يحدث في مصر" على فضائية "إم بي سي مصر" اليوم الثلاثاء: "مجال دراستي الحقوق فكنت فاهم كلام الرئيس ولكني حبيت أطمن على مستقبلي هبقى فين بعد كده"، موضحًا أن الدولة المصرية تقوم بعدد من المشروعات في مصر فهي إنجازات لا يصدقها عقل لأنها تحدث بأعلى جودة وفي وقت قليل.

وتابع: "حبيت استفسر بس أننا كشباب هيكون لينا شباب في هذه المشروعات كداعم أساسي"، موضحًا: "عايزين نأسس مع الرئيس السيسي بلدنا مش لجيلنا بس لا دا للجيل اللي جاي بعدنا".

وأردف "وائل": "أنا مكنش غرضي هبقى فين لما أخلص كليتي، ولكن غرضي إني بتكلم عن عامة الشباب بأننا هنكون فين بعد كده، واقتنعت بحوار الرئيس عن الرقمنة والكورسات ولازم كلنا كشباب نفهمه ونسمعه كويس، وندور وراء الكلام عشان نتعلم ونستفيد"، مؤكدًا: "كل المجالات سوق العمل محتاجها، ولكن مجال زي الذكاء الاصطناعي سوق العمل في أشد الاحتياج إليه ودا اللي جاي والمستقبل".

ووجه رسالة للطلاب في الثانوية العامة، قائلًا: "الكليات الطبية مش هي بس الفخر بتاعكم ولكن في كليات زي الذكاء الاصطناعي ليها مستقبل جميل، ولو سمعت كلام الرئيس من 3 سنين كنت دخلت كلية ذكاء اصطناعي"، مؤكدًا أنه سيقوم بأخذ كورسات في الذكاء الاصطناعي والرقمنة الفترة القادمة.

وأوضح: "حواري مع الرئيس السيسي اليوم هو نتاج عن تربية أسرتي، ومهما أشكر في والدي ووالدتي مش هوفيهم حقهم بيوجهوني للصح ومش هقدر أوفي حقهم وكانوا فخورين بيا اكيد طبعًا".