"مهزلة".. إيمان الحصري تكشف تفاصيل مرضها خلال الـ 8 أشهر الماضية

كتب- محمد أبوالمجد:

كشفت الإعلامية إيمان الحصري، تفاصيل مرضها خلال الـ 8 أشهر الماضية، قائلة: "معرفش لحد دلوقتي ايه حصلي، فجأة حياتي اتشقلبت بعد ما كانت صحتي كويسة وحياتي طبيعية"، مضيفة: "كان عندي مشكلة كان المفترض داخلة أعمل عملية بسيطة وهخرج بعد يوم أو يومين بالكتير فجأة لقيت عدى 8 شهور".

وأوضحت "الحصري" في حوارها لبرنامج "صاحبة السعادة" مع الفنانة إسعاد يونس، على فضائية "دي إم سي" اليوم الاثنين: "المشكلة مكنش في العملية ولكن كانت في الخطأ الطبي الذي حدث في العملية، وهو كان خطأ في القاولون والأمعاء"، متابعة: "الخطأ الطبي والمضاعفات ممكن يكون وارد، ولكن المشكلة كانت في الطريقة التي تم التعامل فيها مع الكارثة اللي حصلتلي".

وأكدت: "الدكاترة اللي تابعوا حالتي لاحقًا قالولي اللي حصلك كان مهزلة"، موضحة: "كان ممكن لو تم اتخاذ قرار صح حتى مع الخطأ الطبي الكبير، كان ممكن مقعدش الفترة دي كلها في المستشفى ويحصلي المضاعفات الكتير دي بعد كده، ولكن التعامل كان خاطئ في الخطأ الطبي الذي حدث لي".

وأردفت، الإعلامية إيمان الحصري: "عملت 7 عمليات في خلال 21 يوم، وأخذ بنج كلي، وكل مرة بخرج الوضع يسوء أكتر والأخطاء دي السبب أني أفضل تعبانة 8 أشهر، لو كان الموضوع اتعاملوا معاه بطريقة صح كان ممكن ياخد شهر أو شهرين بالكتير وأبقى كويسة".