"ربما تحدث معجزة والمهم غلبنا الدحيل".. أحمد موسى عن مباراة الأهلي وبايرن ميونخ

كتب- محمد خميس:

علق الإعلامي أحمد موسى، على فوز النادي الأهلي على فريق الدحيل القطري في الدور ربع النهائي لبطولة كأس العالم للأندية وتأهله لنصف نهائي البطولة القارية أمام فريق بايرن ميونخ، قائلًا: "الهتافات كانت مالية مصر يوم الخميس، وكل مصر كانت بتتفرج على المباراة، وأهم شيء أننا غلبنا الدحيل، وغلبنا قطر وربنا يكرمنا في مباراة بايرن ميونخ".

وأضاف "موسى" في خلال تقديمه لبرنامجه "على مسؤوليتي" على فضائية "صدى البلد" اليوم السبت: " النادي الأهلي كان جيد جدًا في الشوط الأول لمبارة الدحيل، وربنا كرمنا بحسين الشحات وسجلنا هدف والشوط التاني كنا بعافيتين تلاته ولو حصل يوم الاتنين هيبقى عندنا مشكلة رهيبة ونص الفرصة مع البايرن لو مخلصناش هيخلصوا علينا".

وتابع: "فرقة بايرن ميونخ شوفنا ماتشهم مع برشلونة دا فريق بيهاجم بـ 10 لاعبين وبيدافع بـ 11 لاعب، وعندهم حارس اسمه مانويل نوير حيطة، والأهداف اللي بتدخل فيه لازم 5 ينفردوا بيه عشان يسجلوا هدف"، موضحًا: "نلعب ماتش حلو ونؤدي مباراة محترمة ممتازة لأننا بطل أفريقيا".

وأردف "موسى": "لاعبي بايرن مش بيهزروا ولازم ناخد بالنا من عدم التسرع، لأن كل اللاعبين بيسجلوا أهداف"، موضحًا: "قد تحدث المعجزة يارب واحنا عملناها عام 1977 وكان بيبو سجل الهدف الثاني في ماتش ودي، ولكننا فوزنا عليهم قبل كده"، مؤكدًا: "ننزل نلعب بكل ارتياح معندناش قلق ولا ضغط خالص لو اتغلبنا طبيعي لأن بايرن أحد أفضل أندية العالم".