وزير الآثار يكشف حقيقة تجسيد هند صبري للملكة حتشبسوت في نقل المومياوات الملكية

كتب- محمد خميس:

كشف الدكتور خالد العناني وزير السياحة والآثار، حقيقة ما تردد عن تجسيد الفنانة التونسية هند صبري لشخصية الملكة حتشبسوت خلال فاعلية نقل المومياوات الملكية من المتحف المصري بالتحرير إلى متحف الحضارة، قائلًا: "عشان اتكلم على حاجه لازم أكون شفتها الأول، والناس اللي قعدت تتكلم بقولهم نتسنى ليوم السبت بالليل وبعد ما نشوف نقيم الحدث".

وأضاف "العناني" في مداخلة هاتفية لبرنامج "يحدث في مصر" على فضائية "إم بي سي مصر" اليوم الأربعاء، موجهًا رسالته للمصريين: "نحاول نفرح ونتلم كلنا على حاجه حلوة ونحاول منهاجمش حاجه عشان نطلع بلدنا حلوة"، مؤكدًا: "شوفوا الأول واللي يلاقي حاجه تهين الحضارة المصرية وتهين مصر يبقى نتكلم فيها في ساعتها".

وتابع: "لما نشوف الأغاني ونسمع الأوركسترا المحترمة وموسيقى الجيش والشرطة وأحصنة الداخلية وموتسيكلات رئاسة الجمهورية واللي يلاقي حاجه فيها عدم لياقة أو عدم احترام له كل الحق أن ينتقد، وتعالوا نعيش في أمل أن بلدنا جميلة وبشكر كل الفنانين المتطوعين المصريين اللي شاركوا معانا ومصر طول عمرها فاتحه ذراعتها لكل الفنانين في الوطن العربي وبيغنوا لمصر طول عمرهم، ولكن لن يكون هناك فنانة مصرية أو غير مصرية ستجسد شخصية الملكة حتشبسوت، لأن الملكة ستجسد نفسها من خلال موميائها".

وأكد: "بشكر كل من شارك في هذا العمل من طلاب وفنانين، وهنشوف حاجه رائعة وتعالوا منحاولش نحرق الحدث ونحاول نظهر بلدنا بشكل جميل وبعد الحدث ولو أي حد في حاجه مش عاجباه ننتقد ونقول براحتنا"، موضحًا: "تواصلت مع شخصيتين عالميتين مشهورين جدًا في مجالين مختلفين للظهور في الحدث والشركة المنظمة فضلوا ترك هاتين الشخصيتين لافتتاح المتحف المصري الكبير".

وأردف، وزير السياحة والآثار، أن المومياوات مؤمنة تمامًا وتم وضعها في كبسولات وترميمها بالشكل المناسب وتؤهل للعرض يوم 18 ابريل المقبل، قائلًا: "سلامة المومياوات هي الأساس الأول قبل أي فاعلية".