نقاش حاد بين مفيدة شيحة وعبير صبري عن تعدد الزوجات.. والأخيرة: "احترموا شرع الله"

كتب- محمد أبوالمجد:

نشبت نقاشًا حادًا بين الإعلامية مفيدة شيحة والفنانة عبير صبري، في أولى حلقات برنامج الستات، المذاع عبر قناة النهار، اليوم الأربعاء.

وخلال فقرة بالبرنامج، طرح سؤالا :"هل توافق على سجن الزوج في حالة إخفاء الزواج بأخرى؟"، وردت عبير: "استغربت جدًا بسبب مشروع القانون دا، وبيتكلوا فيه وأنا شايفه إنه ضد شرع الله، والقانون يستند إلى الشرع والعرف".

وقالت "عبير": "مفيش حاجة قالت في الشرع أنه لابد من موافقة الزوجة على زواج زوجها ومعرفتها، ربنا ادا الراجل رخصة ومش هنناقش دلوقتي الرخصة دي، أحنا دلوقتي في التفسيرات بنقول لأ بشرط أن يعدل بينهم ودا مش موضوعنا دلوقتي".

وأضافت: "الراجل من حقة الزواج تاني إذا عدل ولديه القدرة المادية، مش هينفع شرع ربنا يقول الراجل له رخصه في شيء والقانون يقول لأ أنا مش عاجبني الموضوع دا والست لازم تعرف والست لازم تعرف ولو معرفتش هتحبسك من سنة لـ 3 سنين أو هتدفعك غرامة".

وأكدت: "شايفة أن البيت بيبقى فيه بوادر أن العلاقة بين الزوج والزوجة مش متظبطه أو فيها خلل، وتقدر الست بفطرتها تحس أن الراجل معه علاقة أخرى خارج منزلها"، موضحة: "مش هحبس الراجل من سنة لـ 3 سنين عشان مقاليش أنه اتجوز، الراجل له القوام على الست، سواء أحنا نساء عاجبنا أو مش عاجبنا".

وردت الإعلامية مفيدة شيحة، قائلا :"قوام بأيه، ومش بقول إنه مايتجوزش، ولكن يجي يقول لزوجته الأولى إنه ناوي يتجوز تاني، ولا يذهب للجواز بدون علمها".

وأنهت عبير صبري، قائلة : "أحنا مالنا يا مفيدة يقولي أو لا أحنا نكلم ربنا في الموضوع دا، ربنا اللي قال أن الراجل من حقه يتجوز أكتر من واحدة والراجل قوام بالعاطفة والفلوس والرعاية وكل شيء، والزواج الثاني لا ينقص منه شيء، الراجل مينفعش يتسجن يا جماعة احترموا الرجالة عشان نعرف نعيش، واحترموا شرع الله".