لبنى عسل تكشف تفاصيل آخر لقاء مع وائل الإبراشي قبل وفاته- فيديو

كتب- محمد أبوالمجد:

كشفت الإعلامية لبنى عسل عن آخر لقاء مع الإعلامي وائل الإبراشي، أثناء علاجه بالمستشفى، قبل وفاته متأثرًا بفيروس كورونا.

وقالت الإعلامية لبنى عسل: "كان إنسان وصديق وزميل وعشرة عمر على المستوى الإنساني، يمكن أنا شوفته واتكلمت معاه في الوقت اللي كان في المستشفى في الفترة الطويلة اللي كان فيها هناك، ووالدي الله يرحمه في الفترة دي كان موجود هناك ولما عرفت أن وائل كان في نفس الدور طلبت أني أطمن عليه وقتها قالولي إنه مش عايز يشوف حد ومش عايز يكلم حد وكان مدايق من الإشاعات والأخبار، لأنه كان كل شوية خبر يطلع بوفاته".

وأوضحت: "كان من الصعب عليه وهو بيتعالج وبين أيدين ربنا في وقت قاسي يسمع خبر وفاته وهو في المستشفى على السرير، ودخلوا له وكنت واقفه بره على باب غرفته وسمعته وهو بيقول إنه مش عايز يشوف حد ولما عرف إني لبنى قالهم خليها تدخل، وقتها كان نفسي ادخل لأنه كان نفسه حد يقف جنبه وأننا نقف جنب بعض".

وأكدت: "دخلت شفت وهو كان بطل ومقاتل بكل معنى الكلمة، يعني الوضع كان صعب أوي بجهاز تنفس والرئة تكاد تكون اتدمرت تمامًا لأن نسبة التليف فيها كانت عالية جدًا، وكان فاتح التليفزيون وبيفترج على البرامج قولتله ريح دماغك من المشاكل والأخبار وقالي هشوف وهرجع واشوف الأخبار، وكان مصر على الكلام".

وأشارت: "قولتله تحب أقول للناس أي حاجة قالي لأ لا عايز حد يتكلم عني ولا حد يقول أخبار عني، ربنا يرحمه يارب، التوقيت كان صعب وهو عانى اتدمرت تمامًا والابتلاء والمرض بيبقى كفارة، الله يرحمه".