"كانت بتزغرط في طريقها للمدرسة".. أسرة ضحية مدرسة العجوزة تكشف تفاصيل جديدة في واقعة وفاة ابنتهم

كتب- محمد أبوالمجد:

روت مديحة إبراهيم، والدة طالبة ضحية مدرسة العجوزة، تفاصيل وفاة ابنتها، عقب سقوطها من الدور الرابع بأحد مدارس العجوزة، قائلة: "قامت فرحانة بعد الفجر وطلعت هدومها بنفسها ونزلت بسرعة الشارع وقالت لأبوها هستناك تحت العماره، وكل شوية ترن على أبوها وتقوله أخرتني".

وقالت "مديحة" في حواره لبرنامج "يحدث في مصر" على فضائية "إم بي سي مصر" اليوم الثلاثاء: "روحنا المدرسة ووإحنا في الطريق كانت ماشيه وبتضحك وبتزغرط وبتسقف وفرحانة وأخوها بيقولها حد بيفرح كده وهو رايح المدرسة، وأنا دخلتها بأيدي للمدرسة وكانت بتجري عشان تطلع فصلها"، موضحة: "كانت بتجري عشان تطلع المدرسة وكل دور بتجري على الفصول وطلعنا الرابع قولتلها دا دورك يا منه، وكان نفس فصلها زي السنة اللي فاتت".

وتابعت: "السنة اللي فاتت كان عليها مدرسة واحده والسنة دي 3 مدرسين، والحادثة عرفنا إنها حصلت الساعة 11 الصبح، والمدير سابها واقعة من الدور الرابع لحد 12.5 الظهر"، موضحة: "أحد أولياء الأمور جت لي وقالتلي إن منه بنتي لما شالتها ونقلتها للمستشفى قالت لها عايزة ماما وديني لماما".

وأردفت: "الناس كسروا الباب بتاع المدرسة لما سمعوا صراخ العيال في المدرسة، ولما دخلوا قالوا حرام عليكم وجت تشيلها المدير قالهم مسؤولية علينا، وفضلنا في النيابة من العصر لحد 1 ونص بالليل، وأنا عايزه حق منه بنتي".

وفي نفس السياق قال تامر فرج والد ضحية مدرسة العجوزة: "اللي اتقال عن بنتي إنها خرجت من غير ما المدرس يشوفها محصلش، والناس أول ما شافوني عند المستشفى قالوا لي متسيبش حق بنتك"، موضحًا: "الست اللي جت زارتنا وحكت لنا تفاصيل الواقعة لم تشهد في النيابة خوفًا من المشاكل، وإحنا منعرفهاش وأول مرة نشوفها".

وأكد: "قالوا إن بنتي خرجت ووقعت من الدور الرابع لوحدها، طب ازاي والسور ارتفاعه 3 متر بالحديد اللي عليه، وبنتي كان لو حد زعق لها بتفضل مكانها مش بتتحرك"، موضحًا: "قالوا لي إن المدرس أشرف ضربها على ايديها بالعصاية وعلى كتفها".

وأروضح: "مش معايا محامي يتابع القضية ومش معايا غير ربنا"، ليرد الإعلامي شريف عامر قائلًا: "أحد المحامين تواصل معنا واتبرع إنه هيبذل مجهوداته لمساعدتكم وتبني القضية للوصول للحق".