"عايز حق بناتي".. والد طفلتي الإسكندرية ضحية حقنة المضاد الحيوي يكشف تفاصيل الواقعة

كتب- محمد أبوالمجد:

كشف محمد سعد والد طفلتي الإسكندرية إيمان وسجدة ضحية حقنة المضاد الحيوي، تفاصيل الواقعة، قائلًا: "ما حدث كان مجرد صرف علاج عادي بنتين مكتوب لهم مضاد حيوي من الدكتور وكنا في حي اسمه المطار، والدكتور كتب لكل واحدة فيهم حقنة مختلفة عن التاني"، مضيفًا: "بناتي كان عندهم حساسية على الصدر وكحه وبرد بحكم أول أسبوع في المدرسة وتغير الجو وكان لازم أجري على عيالي".

وقال "سعد" في مداخلة هاتفية لبرنامج "يحدث في مصر" على فضائية "إم بي سي مصر" اليوم الأربعاء: "خرجنا من عند الدكتور والدتهم جابت الحقن لبناتي إيمان وسجدة، وقاموا بعمل اختبار حساسية لهم في اليوم الأول في أحد الصيدليات بمنطقة المطار، وعادت لمسكنا في منطقة بشائر الخير 3، وكانت تبحث عن الجرعة الثانية ليلًا.

وتابع: "زوجتي توجهت لأحد الصيدليات باسم "أسماء ومها" وقالوا لها في حقنة موجودة والأخرى غير موجودة، ومراتي قالت لهم هدور عليها وبعد بحث زوجتي رجعت للصيدلية وقالت للصيدلانية النوع التاني مش موجود، ردت قالتلها النوع شاحح في السوق، والمواد الفعالة في الحقنتين هما هما بس الشركات مختلفة، والأم مش دكتورة".

وأردف: "الصيدلانية قالت لأم العلاج دا هو دا والكيبرة هتاخد زي الصغيرة، فالأم قالت للصيدلانية مش هتعملي اختبار لهم، وردت عليها وقالت لها مش واخدين إمبارح وعاملين اختبار البديل هو هو، فالبنت البكيرة أخدت الحقنة من هنا وحست بوجع في رأسها من الخلف، والصغيرة أخدت الحقنة وحست بضيف تنفس وبترجع"، موضحًا: "بقول للدكتور ألحقني يا دكتور لقيت شاب في الصيدلية بيقولي بنتك جعانة طلعها تاكل، قولتله دي بترجع أكل، قالي خدها وامشي ولما الناس اتلمت قالولي خدها وامشي".

وأكمل: "اخدت بنتي على صيدلية تانية قلت الحقني يا دكتور، والدكتور هناك قالي أجري على المستشفى، ولما وصلت المستشفى عملت مشكلة وقولتلهم عيالي بتموت، والدكاترة في المستشفى فضلوا شغالين على حالة بناتي من الساعة 11.30 وحتى الـ 5 الفجر"، مؤكدًا: "أنا عايز حق عيالي ولا عشان إحنا غلابة؟ أنا حرام اتحرم من بناتي".