"التسخين ليس في مصلحة أحد".. عمرو أديب عن حادث منع تقديم الأكل لمواطن بمحل كشري

كتب- محمد أبوالمجد:

علق الإعلامي عمرو أديب، على حادث منع تقديم الأكل لمواطن في محل كشري، قائلًا: "ملاحظ أن في موضوع بدأ يطل براسه بعد ما قطعناها في السنين اللي فاتت، ورأيي أن الناس ممكن تغضب أو تضايق ولكن بقدر، بلاش المبالغة في الأشياء".

وقال "أديب" في خلال تقديمه لبرنامج "الحكاية" على فضائية "إم بي سي مصر 2" اليوم السبت: "حادثة محل الكشري خلصت وطلع بعدها حادث محل الأيس كريم وخلصت وبعدها حاجات من بتاعت زمان"، موضحًا: "الموضوع دا قفلناه تمامًا مسلم ومسيحي قفلناه تمامًا، وابتدى فيه تلاسن بايخ، والأمر دخل فيه شيوخ في النص بتسخن الحكاية وبيتكلموا عن عظمة الإسلام وكرامة المسلم والتسخين دا ليس في مصلحة أحد".

وتابع: "ممكن يكون في حادث بيضايق حد بس هنا نقطة ونقلب الصفحة، ليست مسألة عامة، لأن في مليون محل في مصر و100 مليون إنسان آخر وهي ليست قضايا عامة أو أشياء يجب التوقف عندها".

وأردف: "في ضيق وغضب بقدر الموضوع وحاسس أن الأمر بدأ يكبر شوية خلينا نلم الموضوع ونبص للمشاكل اللي عندنا عندنا مشاكل كتير لازم نحلها أهم كتير من أننا نضيع الوقت في إننا نطربق البلد على دماغنا".