شاهد بواقعة "فتاة البلكونة": "البنت كانت خايفة من أبوها وراحت تحدف نفسها"

كتب – معتز عباس:

كشف شاهد عيان يدعى أشرف محمد حقيقة محاولة أب إلقاء ابنته من شرفة منزله بشارع فيصل، بعد انتشار الفيديو عبر منصات مواقع التواصل الاجتماعي والسوشيال ميديا.

وقال "محمد"، في مداخلة لبرنامج "يحدث في مصر"، المذاع عبر فضائية "ام بي سي مصر2"، اليوم الثلاثاء، إنه كان يعمل في الورشة ثم تفاجئ بسماع صوت عالي من إحدى "البلكونات" ليجد فتاة مُعلقة ببلكونة إحدى الشقق، متابعًا: "كنت شغال في الورشة سمعت زعيق وصويت وشوفت البنت متعلقه في البلكونة".

وأضاف، قائلًا: "البنت عايشة في الدور الأول بعد الأرضي والأب مستأجر الشقة في عمارة عائلة، ومفيش أب هيحدف بنته من البلكونة، الللي حصل أن البنت كانت خايفة من ابوها وجريت عشان تحدف نفسها لكن أبوها حاول يلحقها ومسك ايديها، احنا جرينا عليه عشان نرفع البنت من البلكونة لأنه عنده نسبة عجز في ايده".

وأكمل: "أبوها كان مضايق وعايز يضربها ومديت ايدي عليه وقولت له ازاي يضربها، والدنيا اتلمت والبنت كويسة متعرفش حصل اية لقينا الفيديو متصور واتنشر على الانترنت وبهدل الدنيا، وكل الناس بقيت بتتكلم كلام ملوش لازمة"، متسطردًا: "مفيش حد هيرمي ضناه من البلكونة ولو طلبت شهادتي في النيابة هشهد بالحق".