بعد تحريرهما من الاختطاف بجنوب أفريقيا.. طالبا الطيران: "فضلنا متكلبشين 27 يوما"

كتب- محمد أبوالمجد:

روى مؤمن هيثم، طالب الطيران الذي تعرض للاختطاف في جنوب إفريقيا، تفاصيل اختطافة من قبل إحدى العصابات، قائلًا: "تم اختطافنا يوم 13 مايو، كنت رايح أنا وفادي سعيد واللي تم اختطافي معه، جوهانزبرج، ورايحين مدينة أخرى، وكنا راجعين متأخر وكانت الساعة 3.30 صباحًا، وكنت سايق العربية على الطريق السريع، لقيت عربية قطعت طريقي، وعربية تاني ورايا، وكان فيها حوالي 4 أشخاص معاهم سلاح وقاموا بتصويب السلاح علينا، وكانوا لابسيت فيست مكتوب عليه "بوليس".

وأضاف "مؤمن" في حواره لبرنامج "يحدث في مصر"، على فضائية "إم بي سي مصر" اليوم الثلاثاء: "قلت طالما بوليس مفيش مشكلة، لقيناهم مكلبشنا وأخدوا العربية بتاعتنا واتحركوا بيها، وأول ما ركبنا لقيت صورتي مبعوته لسائق السيارة التي اختطفونا فيها، وكانت صورة ليا متاخدة من أحد القصص الخاصة بصفحتي على الإنستجرام".

وتابع: "قولتله رايحين بينا على فين، قالولي رايحين مركز الشرطة، وبعدها نزلونا ودخلونا شنطة العربية، ونزلونا وغموا عنينا، ودخلونا مكان ضلمة، وسألته قولتلهم أنتوا مش بوليس أنتوا مافيا قالولي أه، وكانوا بيقولوا لنا أهدوا أهدوا، وبعدها خدوا رقم والدي وفادي أداهم رقم حد من أسرته".

وأردف: "كانوا بيخلوني أسجل فيديوهات بدون ما يكون وشي ظاهر فيه، وكل فترة يخلوني أعمل تسجيل لوالدي، وجم قالولنا كل واحد فيكم هيعمل تسجيل لأهله يقول فيها أمارة"، مؤكدًا: "فضلنا 27 يوم في نفس المكان اللي تم احتجازنا فيه مخرجناش، كان قاعد معانا اتنين مكنوش بيخرجوا من الغرفة خالص، وكانوا بيعاملونا حسب مزاجه من يوم ما اتخدنا لحد آخر يوم الكلبشات متفكتش من إيدينا خالص، والكلبشات مربوطة في حاجة، وكانوا بيكلمونا إنجليزي لكن بينهم وبين بعض لغة من اللغات في جنوب أفريقيا".

وأوضح: "أصعب الحظات كانت آخر يوم واحنا مروحين".

وفي نفس السياق، قال زميله فادي سعيد، طالب الطيران الذي تعرض للاختطاف في جنوب إفريقيا: "كانت تجربة صعبة ولكني ممكن أرجع تاني جنوب أفريقيا لو الجهات الأمنية سمحت لي بذلك، ودا بسبب حبي للطيران"، متوجهًا بالشكر السفير المصري أحمد الفضل اللي وقف جنبنا، وكان عايز يوصلنا مصر بأي طريقة، ولو مفيش طيران هرجعكم لوحدكم".