"أمنيات من الكارهين وهنفضل واجعينهم".. أحمد موسى ردًا على شائعة نقله للمستشفى

كتب- محمد أبوالمجد:

رد الإعلامي أحمد موسى على شائعة نقله للمستشفى إثر أزمة صحية، قائلًا: "النهارده لقيت ناس بيكلموني ويكلموا بيتي وأولادي يطمنوا عليا، ولكني الحمدلله أنا أهو موجود وقدام حضراتكم، ودي الشائعات اللي بتروج ضد الدولة وضدي، ودي امنيات من الكارهين للدولة المصرية والطابور أياه".

وأضاف "موسى" خلال تقديمه لبرنامجه "على مسئوليتي" على فضائية "صدى البلد" اليوم الاثنين: "دا واحد من الجرذان ومن يروج الشائعات يدخل في إطار بث الشائعات ويحاسب عليه القانون، وعارفين عداوتهم للبلد وهما أعداء مصر"، موضحًا: "طلعت أحد المواقع المداره من تركيا الخاص بالتنظيم الدولي الإرهابي ونشر أخبار عن صحتي، ودا موقع إخواني والإخوان مش عارفين يعملوا ايه عشان يخلصوا مننا بس مش بإيدهم ولا بأيد حد دا بأيد الواحد الأحد".

وتابع: "مش بأيد الإخواني وغير الإخواني أو من يتمنى، بس إحنا واجعينهم وهنفضل نوجعهم وهنفضل على عهدنا العظيم وببلدنا العظيمة وبكل مؤسسات الدولة المصرية، هنفضل ندافع عن بلدنا لآخر نفس، ومش هنبقى زيكم وإحنا واجهناكم في عز وجودكم في البلد".

وأردف: "ممتن لكل الناس اللي عمالين يتكلموا ويطمنوا على صحتي والحمدلله مفيش فيا حاجه، هما بيستهدفوا الدولة وكل دقيقة شائعة فطبيعي يتكلموا عليا لأنها مش أول ولا آخر مرة، وأحيانًا يستغلوا إني خميس وجمعة إجازة فيضربوا ثلاث أو أربع شائعات وراء بعض، ولذلك كان لابد من الرد عشان الناس اللي قلقانة".